Կառավարությունն իր այսօրվա՝ նոյեմբերի 7-ի նիստում որոշում կայացրեց լրացուցիչ արտոնություն տրամադրել «ԷՅ ԸՆԴ ԷՄ ՌԵՅՐ» ՍՊ ընկերությանը:
Նշենք, որ այս ընկերությունն այս տարվա մարտի 14-ին մաքսատուրքից ազատվելու արտոնություն էր ստացել՝ ներկայացրած ծրագրի շրջանակներում: Հիմա անհրաժեշտություն է առաջացել փոփոխություն կատարել այդ որոշման մեջ:
Սույն որոշման նախագծի մշակումը պայմանավորված է «ԷՅ ԸՆԴ ԷՄ ՌԵՅՐ»-ի կողմից գերակա ոլորտում իրականացվող ներդրումային ծրագրի իրականացումն ապահովելու անհրաժեշտությամբ:
«ԷՅ ԸՆԴ ԷՄ ՌԵՅՐ»ՍՊԸ-ն ներմուծել է սարքավորումներ քաղցրահամ եւ հանքային ջրերի շշալցման համար: Ներկայումս անհրաժեշտություն է առաջացել չորրորդ փուլով ներմուծել 30 մլն դրամի չափով ապրանքների լրացուցիչ խմբաքանակ` առաջիկա արտադրական պրոցեսի բնականոն ընթացքը չխաթարելու համար:
Համաձայն ընկերության կողմից տրամադրված տեղեկատվության` ներդրումային ծրագրի շրջանակում ընկերությունում ստեղծվել է 23 նոր աշխատատեղ եւ իրականացվել1,86 մլրդ դրամի ներդրում:
Արտոնության առկայությունը լուրջ խթան կհանդիսանա նոր ներդրումային ծրագրերի իրականացման եւ որպես հետեւանք նոր աշխատատեղերի ստեղծման, ներդրումների ներգրավման, տեղական արտադրության եւ արտահանման խթանման համար: