Մոսկվայում Իրանի նոր դեսպան կդառնա Ղազեմ Ջալալին, որը մինչեւ վերջերս երկրի մեջլիսի (խորհրդարանի) պատգամավոր էր, տեղեկացնում է ՏԱՍՍ-ը՝ հղում կատարելով ISNA իրանական գործակալությանը։

Պատգամավորի պաշտոնից Ջալալիի հրաժարականի օգտին քվեարկել է 146 պատգամավոր։ Քվեարկությանը մասնակցել է 221 խորհրդարանական։

Մեջլիսի նախագահ Ալի Լարիջանին բարձր է գնահատել Ջալալիի աշխատանքը որպես պատգամավորի, ինչպես նաեւ մաղթել է հաջողություններ Ռուսաստանում Իրանի դեսպանի պաշտոնում։

Ռուսաստանում Իրանի դեսպանի պաշտոնը 2013-ից զբաղեցնում էր Մեհդի Սանաին։ Նրա լիազորությունները Մոսկվայում Իրանի Իսլամական Հանրապետության մշտական ներկայացուցչի պաշտոնում կավարտվեն մի քանի ամսից։