Կառավարությունը պարտավոր է օպերատիվ միջոցառումներ իրականացնել, որպեսզի ծառայությունների որակը լինի բարձր, եւ կոռուպցիոն ռիսկերը նվազագույնի հասցվեն:
Այս մասին այսօր` ապրիլի 7-ին կառավարության նիստում հայտարարել է երկրի վարչապետ Տիգրան Սարգսյանը, հավելելով, որ առաջին այդպիսի քայլն արվել է, երբ կառավարությունը փորձել է կանոնակարգել մեքենաների տեխնիկական զննման գործընթացը:
«Մեր քաղաքացիները պետք է հասկանան, որ այս որոշման արդյունքում այն 5000 դրամ շորթումը, որ տեղի էր ունենում, այլեւս չպետք է տեղի ունենա։ Դրա համար մենք վերացրել ենք բոլոր հիմքերը, որովհետեւ կառավարության որոշումով այսուհետեւ տեխնիկական զննում իրականացնող կազմակերպություններն իրենք պետք է շահագրգռված լինեն բարձր որակի ծառայություն մատուցել, որպեսզի քաղաքացիներն ընտրեն հենց իրենց ծառայությունը։ Սա առաջին քայլն էր, որ մենք ձեզ հետ միասին արել ենք»,- հայտարարել է վարչապետը:
Հաջորդ քայլերը, ըստ նրա, նվիրված են լինելու ՀՀ նախագահի կողմից ոստիկանության հետ հանդիպման ժամանակ բարձրացրած խնդիրներին, որովհետեւ ոստիկանության կողմից տրամադրվող ծառայությունների որակը նույնպես պետք է բարձրացվի։
«Մենք մոտակա շաբաթների ընթացքում անդրադառնալու ենք մեքենաների գրանցման եւ վարորդական իրավունքների տրամադրման գործընթացներին, որտեղ առկա են լուրջ կոռուպցիոն ռիսկեր, եւ պարտավոր ենք այստեղ թափանցիկություն ապահովել, եւ պետական այն գործառույթները, որոնք այդ կոռուպցիոն ռիսկերն ստեղծում են, պետք է վերացնենք»,- ընդգծել է Տ. Սարգսյանը:
Հաջորդ քայլը նվիրված է լինելու կադաստրի աշխատանքներին, որտեղից նույնպես գալիս են դժգոհություններ, ինչպես նաեւ ՔԿԱԳ-երի աշխատանքներին: «Քաղաքացիները նույնպես դժգոհում են, որ այդտեղ կան լուրջ կոռուպցիոն ռիսկեր։
Մենք ձեզ հետ միասին անդրադարձել ենք անձնագրերի տրամադրման գործառույթներին, որտեղ առկա են լուրջ կոռուպցիոն ռիսկեր։ Մեր վերջին մոնիտորինգի արդյունքները վկայում են այն մասին, որ այսօր կոռուպցիան այդ բնագավառում իսպառ բացակայում է։ Նշանակում է` երբ կառավարությունը համապատասխան որոշումներ է ընդունում, կարգերը պարզեցնում է, դարձնում է թափանցիկ, մենք կարողանում ենք հասնել հաջողության, եւ իմ կողմից թվարկված ոլորտներում նույնպես մենք կարճ ժամանակահատվածում պետք է հասնենք նույն արդյունքներին, ինչին մենք հասանք անձնագրերի տրամադրման գործընթացը կանոնակարգելու պարագայում»,- ասել է նա: