Իսպանիայի վարչապետի պաշտոնակատար, Իսպանական սոցիալիստական աշխատավորական կուսակցության (ԻՍԱԿ) գլխավոր քարտուղար Պեդրո Սանչեսը եւ ձախ «Պոդեմոս» կուսակցության ղեկավար Պաբլո Իգլեսիասը երեքշաբթի օրը կոալիցիոն կառավարության ձեւավորման մասին նախնական համաձայնագիր են ստորագրել, հայտնում է ՏԱՍՍ-ը։
«Իսպանացիները ընտրություններում արտահայտվել են, եւ մենք պետք է հաղթահարենք քաղաքական փակուղու իրավիճակը»,- ասել է Սանչեսը։ «Քաղաքական նախագիծն այնքան գրավիչ է, որ հետեւում է թողնում ցանկացած տարաձայնություն, որ մեր միջեւ եղել է։ Սա չորս տարով համաձայնագիր է։ Նոր կառավարության հիմքում կլինի հուսալիություն եւ համագործակցություն»,- հավելել է նա։
Ընդ որում, նա չի հրապարակել համաձայնագրի մանրամասները։ Տեղի ԶԼՄ-ների վարկածով պայմանավորվածությունները կարող են ենթադրել, որ Իգլեսիասը նոր կաբինետում կստանա փոխվարչապետի պաշտոնը։
Ստորագրված փաստաթուղթը կազմված է 10 կետից։ Դրանցից մեկում ասվում է, որ Իսպանիայի կառավարության առաջնահերթություններից կդառնա «Կատալոնիայում համակեցության երաշխիքը եւ քաղաքական կյանքի կարգավորումը տարածաշրջանում»։
Նոյեմբերի 10-ին Իսպանիայում տեղի էին ունեցել չորս տարվա մեջ չորրորդ համընդհանուր ընտրությունները։ Դրանց արդյունքներով հաղթել էր ԻՍԱԿ-ը, սակայն կուսակցությունը կոնգրեսում բացարձակ մեծամասնություն չէր ստացել, որպեսզի անխոչընդոտ կառավարություն ձեւավորեր։
ԻՍԱԿ-ը 350 տեղանոց խորհրդարանում ստացել էր 120 մանդատ։ «Միավորվելով՝ մենք կարող ենք» խմբակցությունը ստացել էր 35 մանդատ։ Կառավարություն ձեւավորելու համար կուսակցությանը անհրաժեշտ է նաեւ մի շարք այլ քաղաքական ուժերի աջակցությունը։