ԱՄՆ նախագահ Դոնալդ Թրամփը մի քանի շաբաթ շարունակ սպառնում էր ազատել Սպիտակ տան աշխատակազմի ղեկավարի պաշտոնակատար Միկ Մալվենիին, սակայն ԱՄՆ առաջնորդի օգնականները խորհուրդ են տվել հրաժարվել նման միջոցից: Այս մասին հայտնում է The Washington Post պարբերականը՝ վկայակոչելով Սպիտակ տան աղբյուրներին:
ԱՄՆ նախագահի խորհրդականները պնդել են, որ Սպիտակ տան աշխատակազմի ղեկավարի պաշտոնակատարին ազատելը լավագույն որոշումը չի լինի դեմոկրատների սկսած Թրամփի իմփիչմենթի ընթացակարգի ժամանակ: Նրանց կարծիքով՝ նրա պաշտոնանկությունը որոշակի վտանգ է պարունակում, հատկապես հաշվի առնելով Մալվենիի դերը Ուկրաինային օգնության ցուցաբերման դադարեցման գործում: Դրանից բացի, ԱՄՆ վարչակազմը կարող է խնդիրների բախվել, մինչեւ նրան փոխարինող գտնելը:
ԱՄՆ նախագահը դժգոհ էր Մալվենիի ճեպազրույցից, որը նա լրագրողների հետ անցկացրել էր հոկտեմբերի 17-ին: Ճեպազրույցում նա ընդունել էր, որ Ուկրաինային ռազմական օգնությունն իբր սառեցվել է Կիեւի վրա ճնշում գործադրելու նպատակով, որպեսզի սկսի ԱՄՆ նախկին փոխնախագահ Ջոզեֆ Բայդենի որդու գործով քննությունը: Սակայն ճեպազրույցից անմիջապես հետո Մալվենին հայտարարել էր, որ լրատվամիջոցներն իր խոսքն աղավաղել են, եւ նշել էր, որ ԱՄՆ-ն առաջ չի քաշել նման պահանջներ:
«Ես չեմ կարծում, որ մինչեւ դեկտեմբեր նա ինչ-որ տեղ կգնա,- The Washington Post-ին ասել է Սպիտակ տան աղբյուրը: - Բայց նախագահն այդ ճեպազրույցից անչափ դժգոհ էր: Դա նախագահի համար անչափ վատ օր էր»:
Թրամփի խորհրդականները բերում են նախագահի ազգային անվտանգության հարցերով նախկին օգնական Ջոն Բոլթոնի օրինակը, որին դեմոկրատները հիմա ցանկանում են իմփիչմենթի ընթացակարգի շրջանակում նիստի հրավիրել:
