Այս օրենսդրական փաթեթով առաջարկվում է խստացնել գրպանահատության համար պատիժը: Այս մասին նոյեմբերի 13-ին ԱԺ նիստում Քրեական օրենսգրքում եւ կից օրենքներում փոփոխություններ եւ լրացումներ կատարելու մասին օրինագծերի փաթեթի երկրորդ ընթերցմամբ քննարկման ժամանակ ասաց արդարադատության փոխնախարար Սրբուհի Գալյանը:
Այսպես, ըստ նրա, եթե նախկինում գողին կարող էին պատասխանատվության ենթարկել միայն այն դեպքում, եթե գողացել էր 5 հազար դրամը գերազանցող գումար, ապա հիմա այս նորմը վերացվում է, եւ գրպանահատները քրեական պատասխանատվություն կկրեն՝ անկախ գողության չափից:
Գալյանը նշեց, որ այս օրինագծերի փաթեթը պետք է լուծի մի քանի խնդիր: «Մենք փորձում ենք հաղթահարել անպատժելիության մթնոլորտը, քանի որ հիմա պատասխանատվության են ենթարկվելու անկախ գողացած միջոցների չափից»,- պարզաբանեց փոխնախարարը:
