Ամերիկյան Facebook-ը հայտարարել է Facebook Pay սեփական վճարային համակարգի գործարկման մասին, որով կարելի է վճարումներ կատարել նրան պատկանող սերվիսներում, տեղեկացնում է ՌԻԱ «Նովոստի»-ն։
«Այսօր մենք ներկայացնում ենք Facebook Pay-ը, որը թույլ կտա մարդկանց վճարումներ... կատարել Facebook-ի, Messenger-ի, Instagram-ի եւ WhatsApp-ի միջոցով»,- ասվում է հաղորդագրությունում։
Ընթացիկ շաբաթում Facebook Pay-ը կարելի է օգտագործել ԱՄՆ-ում Facebook-ով եւ Messenger-ով, նշում է ընկերությունը։ Այս վճարային համակարգի օգնությամբ, օրինակ, կարելի կլինի միջոցներ հավաքել եւ ձեռք բերել միջոցառումների տոմսեր, ինչպես նաեւ անձնական փոխանցումներ եւ գնումներ կատարել Facebook Marketplace-ի որոշ վաճառողներից։
Հունիսին Facebook-ը տեղեկացրել էր սեփական կրիպտոարժույթի՝ Libra-ի մասին։ Ակնկալվում է, որ Libra-ի թողարկումը գլոբալ մակարդակով տեղի կունենա 2020 թվականի առաջին եռամսյակում, 2019 թվականի վերջից կսկսվի թեսթավորումը։ Քսակը կպահպանվի ինչպես առանձին հավելվածի, այնպես էլ մեսենջերների միջոցով։
Facebook ընկերությունը եւ համանուն ցանցը հիմնադրվել է 2004 թվականի փետրվարի 4-ին Մարկ Ցուկերբերգի կողմից։ Facebook-ի կենտրոնակայանը Կալիֆոռնիայում է։ Facebook-ն ունի մի շարք հանրահայտ սերվիսներ, ինչպիսին են Messenger-ը, Instagram-ը, WhatsApp-ը։