2019-ին պետական ծախսերը նախատեսված են եղել 221 մլրդ դրամ, սակայն նոյեմբերի դրությամբ ծախսվել է ընդամենը 89 մլրդ դրամը: Այս մասին, այսօր՝ նոյեմբերի 13-ին, ԱԺ-ում լրագրողների հետ հանդիպման ժամանակ նշեց ԲՀԿ խմբակցության պատգամավոր Միքայել Մելքումյանը՝ հավելելով, որ ԲՀԿ-ն դեմ է քվեարկելու նախագծին:
Մնացած գումարը, ըստ նրա, կառավարությունը չի կարողանում ծախսել. «Այսինքն ծախսելու տեղ չկա: Այ քեզ բան, չհասկացա, մեզ փող է անհրաժեշտ, նախկինում վարկեր էինք ներգրավում, հիմա փողը կա, չենք կարողանում ոլորտը գտնենք, որ ծախսենք: Որպես դրա բացատրություն քաղաքական մակարդկաում հնչել է, որ բոլոր այն տենդերները ճանապարհաշինության, ջրամբարաշինություն, որտեղ պետք է ծախսվեն այդ գումարները, հիմնականում հին ընկերություններն են, նորերը չեն առաջանում: Եղածներից մի քանիսի վրա էլ քրգործեր են հարուցված»,-ասաց Մելքումյանը:
Նա նաեւ հավելեց, որ եթե հիմա ներդրումային միջավայրը նպաստավոր է, ինչու Հայաստան չեն գալիս ներդրողները, որոնք փորձառություն ունեն այդ ոլորտներում:
«2020 թվականի բյուջեում այդ 221 մլրդ դրամը բարձրացնում են 359 մլրդ դրամի. «Այդ գումարները բարձրացնում ենք, որ դրանք դնենք ԿԲ հաշվին: Այս պահին այդ հաշվին դրված է 300 մլրդ դրամից ավելի գումար, որը մոտ 650 մլն դոլար է եւ համապատասխան ավանդային տոկոս է ստացվում: Այսինքն բիզնեսի ոլորտներ չկա՞ն, որ այդ ամենը ծախսվի»,-ընդգծեց պատգամավորը: