Google-ը պատրաստվում է օգտատերերին հնարավորություն ընձեռել բացելու ընթացիկ հաշվիներ, հայտնում է The Wall Street Journal-ը: Cache աշխատանքային անունով նախագիծը կգործարկվի 2020 թվականին Citigroup բանկի եւ Սթենֆորդի համալսարանի վարկային միության աջակցությամբ:
WSJ-ն խոսել է Google-ի վճարումների ծառայության ղեկավար Ցեզար Սենգուպտայի հետ, որը նշել է, որ կորպորացիան պատրաստվում է ակտիվորեն աշխատել ֆինանսական ինստիտուտների հետ՝ նրանց վերապահելով նախագծի ֆինանսական կողմը: «Մեր մոտեցումն այնպիսին է, որ սերտորեն աշխատենք բանկերի եւ ֆինանսական համակարգի հետ: Գուցե սա մի փոքր ավելի երկար ճանապարհ է, բայց եւ ավելի հաստատուն»,- հայտարարել է նա:
Տեխնոլոգիական շատ կորպորացիաներ ավելի ակտիվորեն են բանկային ծառայություններ առաջարկում եւ զարգանում ֆինանսական ոլորտում: Այսպես՝ Apple-ն, օրինակ, Goldman Sachs բանկի հետ համատեղ ներկայացրել է սեփական քարտերի թողարկման ծրագիր, Amazon-ը նույնպես բանակցություններ է վարում J.P. Morgan-ի հետ՝ պատրաստվելով իր հաճախորդներին ընթացիկ հաշիվ բացելու հնարավորություն ընձեռել, իսկ Facebook-ը ցանկանում է թողարկել սեփական կրիպտոարժույթ:
Սենատոր Մարկ Ուորները CNBC-ին ասել է, որ մտահոգված է նման նախաձեռնություններով՝ լինի դա Libra թե Google-ի առաջարկ, «երբ տեխնոլոգիական պլտֆորմ-հսկաները նոր ոլորտ են դուրս գալիս մինչ այն, երբ այնտեղ հայտնվում են ինչ-ինչ կարգավորող նորմեր»: «Որովհետեւ հենց նրանք այդտեղ մտնեն, նրանց այնտեղից հանելը գործնականում անհնար կլինի»,- կարծում է նա: