Այսօր իշխանությունից դուրս կան 5-6-7 տարբեր ուժային կենտրոններ, որոնց մտահոգությունները մեծ հաշվով նույնն են: Այս մասին, այսօր՝ նոյեմբերի 15-ին, լրագրողների հետ զրույցում նշեց ԱԺ նախկին պատգամավոր, ՀՅԴ-ից հեռացված Աղվան Վարդանյանը:

Հարցին, թե արդյոք հնարավո՞ր է, որ Վազգեն Մանուկյանի նախաձեռնած «Վերնատուն» ակումբն ի վերջո դառնա քաղաքական ուժ, դնի քաղաքական նպատակներ, նա պատասխանեց. «Կկարողանա՞ն նրանք գտնել այն ոսկե միջինը, միասնական օրակարգը... կարծում եմ՝ անհրաժեշտ է այսօր Հայաստանում ձեւավորել 1-2 հստակ օրակարգ, որոնց շուրջ հասարակությունը կհամախմբվի»:

Անդրադառնալով անվտանգության, Արցախի ոլորտում իշխանությունների որդեգրած քաղաքականությունը, նա նշեց, որ այս դեպքում քաղաքականություն ասելը հանցանք կունենա իր մեջ, որովհետեւ հստակ քաղաքականություն չկա էլ:

«Մենք այս 1,5 տարվա մեջ տեսել ենք շատ տարբեր հայտարարություններ, արդեն արձանագրել ենք մեր նախկին դիրքերից որոշ զիջումներ եւ այն, ինչ կատարվում է բանակցային գործընթացում, մտահոգիչ է:

Բանակցությունները, փաստորեն, մտել են փակուղի, իսկ դա կարող է մեծացնել պատերազմի վտանգը: Մեկն ասում է փաստաթուղթ չկա սեղանին, մյուսներն ասում են կա:Ի վերջո, որն է այն քաղաքականությունը, որ նույնական է Արցախի իշխանությունների հետ: Մեկ տարի առաջ ասածները եւ այսօր ասածները իրար ուղղակի հակասում են»,-ասաց Աղվան Վարդանյանը: