Ես միշտ հանդիպում ունեցել եմ և միշտ ունենալու եմ բոլորի հետ։ Այս մասին Վազգեն Մանուկյանն ասաց այսօր՝ նոյեմբերի 15–ին, «Վերնատուն» հասարակական-քաղաքական ակումբի համաժողովին լրագրողների հետ զրույցում։
Անդրադառնալով հնչող մեղադրանքներին, թե ինքը համագործակցել է նախկին իշխանությունների հետ, Վազգեն Մանուկյանը պատասխանեց. «Ի՞նչ է դա նշանակում, այսինքն՝ ապրե՞լ եմ այդ ժամանակ։ Ես միշտ հանդիպում ունեցել եմ և միշտ ունենալու եմ բոլորի հետ։ Մենք միասին անցել ենք պատերազմ։ Ռոբերտ Քոչարյանը, որ կարճ ժամանակով դուրս եկավ, մենք կրկին հանդիպեցինք, խոսեցինք։ Ես Նիկոլ Փաշինյանին էլ կարող եմ հանդիպել, եթե ինքը կցանկանա հանդիպել։ Մեջներիցդ հանեք, որ կա ինչ-որ մի չար դաշտ, ու վախենաք այդ դաշտին մոտենալ։ Բոլորի մեջ էլ կա սևն էլ, սպիտակն էլ։ Այդ բոլոր մարդիկ արել են հերոսություններ և բազմաթիվ սխալներ։ Նախկին իշխանությունների օրոք, սկսած Լևոն Տեր-Պետրոսյանից, եղել են շեղումներ և ժողովրդի մոտ անվստահություն է առաջացել։ Բայց դա չի նշանակում, որ այդ մարդիկ հանցագործ են, և այդ մարդկանց հետ դու չպետք է նստես, հարցեր քննարկելու։ Այնուամենայնիվ, հաջողվեց Հայաստանում ստեղծել սև ու սպիտակ»։
Հարցին, թե ինչու Սերժ Սարգսյանի իշխանության օրոք չէր բարձրաձայնում խնդիրները, Վազգեն Մանուկյանը պատասխանեց. «Սերժ Սարգսյանի ժամանակ էլ երբ ես Հանրային խորհրդի նախագահն էի, քննարկումներ անում էինք, հանդիպում ու բավականին լուրջ վեճեր էինք ունենում։ Ցավոք սրտի, Նիկոլ Փաշինյանի հետ չհաջողվեց այդ ձևաչափը։ Կարևորում եմ, որ երկրի ղեկավարը պիտի ունենա տեսլական, հստակ ձևակերպի, թե ինչպիսի Հայաստան է ուզում կառուցել, որովհետև երկրի ղեկավարից շատ բան է կախված։ Եթե գար, մենք շատ կոշտ խոսակցություն կունենայինք, ինչպես այստեղ»։