Եվրամիությունը պատրաստ է Բելառուսի հետ վիզային ռեժիմը պարզեցնելու համաձայնագիր ստորագրել։ ԵՄ խորհրդի համապատասխան որոշումը նոյեմբերի 18-ին հրապարակվել է Եվրոպական միության պաշտոնական ամսագրում, եւ այսպիսով, ուժի մեջ է մտել։

Գործընթացը լրիվ ավարտելու համար դեռեւս անհրաժեշտ է գնահատել կենսաչափական անձնագրերի տրամադրման բելառուսական համակարգի անվտանգությունն ու ամբողջականությունը, նշված է փաստաթղթում, տեղեկացնում է DW-ը։

Վիզային համաձայնագրի առաջիկա ստորագրման մասին որոշումը կայացվել էր հոկտեմբերի 14-ին։ Այն նախատեսում է Բելառուսի քաղաքացիների համար շենգենյան կարճատեւ վիզայի արժեքը 80 եվրոյից կրճատել մինչեւ 35 եվրո։ Բացի այդ, քաղաքացիների որոշ խմբի՝ մինչեւ 12 տարեկան երեխաների, աշակերտների եւ ուսանողների, կրթական ուղեւորության մեկնողների, մինչեւ 25 տարեկան հետազոտողների եւ հասարակական կազմակերպությունների ներկայացուցիչների, մշակութային կամ կրթական միջոցառումներին մասնակցողների համար  շանգենյան վիզան անվճար կլինի։

Թե երբ կստորագրվի ԵՄ-ի եւ Բելառուսի միջեւ վիզային ռեժիմը պարզեցնելու համաձայնագիրը, դեռեւս հայտնի չէ։