Իսլամական հեղափոխության պահապանների կորպուսը խստորեն կարձագանքի երկրում ցանկացած հուզումների, որոնք սպառնում են իրանցի ազգի անվտանգությանը, փոխանցում է Mehr-ը:
ԻՀՊԿ-ն իրանցիներին կոչ է արել չենթարկվել «թշնամիների սատանայական կոչերի ներգործությանը, որոնք նրանց դրդում են միանալ Իրանում կայունության եւ անվտանգության պահպանման ճանապարհին անդորրի խախտմանը»:
ԻՀՊԿ-ն նշել է, որ կօգնի ապահովել իրանական քաղաքներում անվտանգությունը եւ կայունությունը, պահպանել ազգի միասնությունը, հստակ արձագանքել ազգի պահանջներին:
ԻՀՊԿ հայտարարության մեջ նշված է, որ ԱՄՆ-ն է գլխավոր մեղավորը, որն աջակցում է հակահեղափոխական ուժերին եւ խախտողներին, որոնք հրահրել էին ամբողջ երկրում վերջին անկարգությունները:
Անցած հինգշաբթի Իրանի նավթամքերքների տեղաբաշխման ազգային ընկերությունը (NIOPDC) հայտարարել էր, որ սովորական բենզինի մեկ լիտրի գինն աճել է 10 հազար ռիալից մինչեւ 15 հազար ռիալ (ԱՄՆ 12,7 ցենտ), իսկ յուրաքանչյուր մասնավոր մեքենայի համար ամսական 60 լիտր մակարդակի սահմանափակում է մտցվել: Լրացուցիչ գնումները կարժենան լիտրի դիմաց 30 հազար ռիալ:
Այս որոշումից հետո երկրում սկսվել էին բողոքի զանգվածային ցույցեր, որոնք վերածվել էին անկարգությունների: Ըստ պաշտոնական տեղեկությունների՝ ձերբակալվել է մոտ հազար մարդ: