Արդեն քանի օր է ուսումնասիրում եմ Երեւանի 2020 թվականի բյուջեի նախագիծը, ահագին հարցեր ունեմ, որի մասին հերթով, կարգով խոսելու եմ: Այս մասին Facebook-ի իր էջում գրել է Երեւանի ավագանու ԲՀԿ խմբակցության անդամ Հռիփսիմե Առաքելյանը:
Նա, մասնավորապես, գրել է. «Ուրեմն, մի զավեշտալի թիվ ասեմ, բռնվեք, որի մասով ոչ մի բացատրություն չկա. թիվ 48 կետով սահմանված ՀՐԱՏԱՊ ԼՈՒԾՈՒՄ պահանջող ընթացիկ աշխատանքներ իրականացնելու համար 2019-ի բյուջեով նախատեսված էր 30 մլն դրամ /2019-ի բյուջեն նախկինների բյուջեն է եղել, չմոռանաք/, հիմա ի՞նչ եմ տեսնում, էս ՀՐԱՏԱՊԻ փողը ավելացրել են 325 միլիոնով... սա աբսուրդ է, կանխատեսումների եւ բյուջեի կազմման անհասկանալի ու չբացատրված, փակագծերը չբացված մի թիվ:
Ասենք ի՞նչ հիմքով է հրատապ ծախսի բյուջեն դառել 355 միլիոն դրամ, այն դեպքում երբ 2019-ին եղել է 30 միլիոն...Հրատապ ասելով ի՞նչ նկատի ունենք, կամ 2019-ին ի՞նչ նախադեպեր ենք ունեցել, որի հիմքով գումարը ավելացել է մոտ 12 անգամ: Սա առաջիկա քննարկումների դեռ մեկ կետ... մնացածը հաջորդիվ»: