Bugatti ընկերության ղեկավարությունը բանակցություններ է վարում Volkswagen կոնցերնի հետ նոր ավտոմեքենայի մշակման համար, որը կարող է դառնալ Chiron հիպերքարի ավելի հարմարավետ եւ հասանելի այլընտրանքը: Այս մասին Bloomberg-ին տված հարցազրույցում ասել է ֆրանսիական ապրանքանիշի ղեկավար Ստեֆան Վինքելմանը:
Թոփ մենեջերի խոսքով՝ վերջին շրջանում Bugatti-ն մեծ գումարներ է վաստակել, ինչը թույլ է տվել բարձրացնել նոր ծրագրի ֆինանսավորման թեման, որը կարող է հավելյալ շահույթ բերել: Ընդ որում, Վինքելմանը նշել է, որ չափազանց բարդ խնդիր կլինի համոզել Volkswagen-ի ղեկավարությանը կանաչ լույս տալ նոր ավտոմեքենային:
Նախնական տվյալներով՝ խոսքը 500 հազարից մինչեւ 1 մլն եվրո արժեքով չորստեղանոց էլեկտրական քրոսովերի մասին է: Bugatti-ն տարեկան մոտ 100 ավտոմեքենա է թողարկում, սակայն նոր մոդելը կարող է թույլ տալ մեծացնել արտադրությունը տարեկան մինչեւ 600-700 ավտոմեքենա:
