Մոսկվան եւ Երեւանը մեկը մյուսի դեմ չեն կարող գործել, քանի որ նրանք ռազմավարական դաշնակիցներ են։ Այս մասին հայտարարել է ՀՀ վարչապետ Նիկոլ Փաշինյանը։
«Չի կարող լինել այդպիսի բան, որ մենք ուզենանք վնասել Ռուսաստանին։ Ամեն դեպքում, դա է մեր պատկերացումը ռազմավարական գործընկերության մասին․․․ Մենք չենք կարող ոչ մի տեղ եւ երբեք գործել մեկս մյուսի դեմ»,- հայտարարել է Փաշինյանը՝ «Ռոսիյսկայա գազետա»-ի խնդրանքով մեկնաբանելով մի շարք ԶԼՄ-ների տեղեկատվությունն այն մասին, թե ԱՄՆ միջոցների հաշվին կառուցված հայկական կենսալաբորատորիաներում կարող են Պենտագոնի պատվերով աշխատանքներ կատարվել։
Վարչապետը նաեւ նշել է, որ այդ լաբորատորիաները ստեղծվել են Միացյալ Նահանգների միջոցների օգնությամբ, սակայն այսօր համարվում են բացառապես Հայաստանի Հանրապետության սեփականությունը։ «Ոչ ոք դրսից առանց մեր երկրի իշխանության ներկայացուցիչների թույլտվության չի կարող ներթափանցել այդ օբյեկտների տարածք»,- հավելել է Փաշինյանը։
Ավելի վաղ հայտնի էր դարձել, որ Ռուսաստանն ու Հայաստանը հետաձգել են այդ լաբորատորիաներ ռուսաստանցի մասնագետների մուտքը թույլատրելու մասին հուշագրի ստորագրումը։ Փաստաթուղթը պետք է ստորագրվեր վերջերս Հայաստան ՌԴ ԱԳ նախարար Սերգեյ Լավրովի այցի ժամանակ, սակայն անհայտ պատճառներով դա տեղի չունեցավ։
«Մենք Ռուսաստանի հետ ունեինք պայմանագրի նախագիծ, մենք պատրաստ էինք այն ստորագրել, սակայն ռուսաստանցի գործընկերները որոշեցին դրա վրա էլի աշխատել։ Կաշախտենք դրա վրա, եւ երբ երկու կողմերը համաձայն լինեն, կստորագրենք»,- պարզաբանել է Փաշինյանը։