ՀՀ քննչական կոմիտեի Կոտայքի մարզային քննչական վարչության Աբովյանի քննչական բաժնում քննվող քրեական գործի շրջանակներում բացահայտվել է բնակարանային գողության եւ գողության փորձերի տաս դեպք: Մեկ անձ ձերբակալվել է: Այս մասին տեղեկացնում է Քննչական կոմիտեն:
Նախնական տվյալներով՝ 2019թ. նոյեմբերի 18-ին, Աբովյան քաղաքի բնակչուհուց ոստիկանության Կոտայքի բաժին հաղորդում է ստացվել այն մասին, որ 2019թ. հոկտեմբերի 26-ին՝ ժամը 12:30-ի սահմաններում, իրենց տան պատուհանի մոտ նկատել է անհայտ անձի, ով փորձել է բացել պատուհանը, սակայն իրեն նկատելով` դիմել է փախուստի: Այնուհետեւ իրենց տնից քիչ հեռու ենթադրյալ հանցագործություն կատարած անձը բռնվել է քաղաքացու մոր եւ հարեւանությամբ բնակվող տղամարդու կողմից:
Դեպքի առթիվ ՀՀ ՔԿ Կոտայքի մարզային քննչական վարչության Աբովյանի քննչական բաժնում հարուցվել է քրեական գործ՝ ՀՀ քրեական օրենսգրքի 34-177-րդ հոդվածի 3-րդ մասի 1.1-րդ կետով:
Նախաքննության ընթացքում պարզվել է բնակարանից առերեւույթ գողության փորձ կատարած անձի ինքնությունը, ով Մայակովսկի գյուղի բնակիչ է` ծնված 1987 թվականին: Վերջինս ձերբակալվել է:
Իրականացված լայնածավալ քննչական եւ այլ դատավարական գործողությունների արդյունքում բացահայտվել է Մայակովսկի գյուղի բնակչի կողմից նախկինում կատարված բնակարանային գողության եւ գողության փորձի 5-ական դեպք:
Նախաքննությունը շարունակվում է, ձեռնարկվում են անհրաժեշտ քննչական գործողություններ` նշված անձի կողմից հնարավոր այլ հանցավոր դրսեւորումները բացահայտելու ուղղությամբ:
