ՆԱՏՕ-ն տիեզերքում օպերատիվ գործունեություն սկսելու որոշում է կայացրել, սակայն առանց այնտեղ զենք տանելու։ Այս մասին հայտարարել է դաշինքի գլխավոր քարտուղար Յենս Սթոլթենբերգը՝ Բրյուսելում ՆԱՏՕ-ի անդամ-երկրների ԱԳ նախարարների հանդիպման արդյունքներով մամուլի ասուլիսի ժամանակ, հայտնում է ՏԱՍՍ-ը։
Սթոլթենբերգն ընդգծել է, որ «տիեզերքը կարող է օգտագործվել ոչ միայն խաղաղ, այլեւ ագրեսիվ նպատակներով»։ «Տիեզերքը երկրի վրա մեր առօրյա կյանքի մասն է, այն կարող է օգտագործվել ինչպես խաղաղ, այնպես էլ ագրեսիվ նպատակներով։ Տիեզերքը կարեւոր է նաեւ զսպման եւ պաշտպանության մեր քաղաքականության համար, մասնավորապես՝ հետախուզական տվյալներ հավաքելու եւ հրթիռների հարձակումը հայտնաբերելու համար»,- նշել է նա։
Բացի այդ, Սթոլթենբերգի խոսքերով, ՆԱՏՕ-ի անդամ-երկրները կուսումնասիրեն տիեզերական սպառնալիքների տեսակները, որոնք կարող են գնահատվել որպես ռազմական հարձակում։ Իսկ դա իր հերթին կարող է ՆԱՏՕ-ի անկյունաքարը համարվող Վաշինգտոնի պայմանագրի 5-րդ հոդվածի գործարկման պատճառ դառնալ։ Այդ հոդվածում ասվում է, որ դաշինքի ցանկացած երկրի վրա ռազմական հարձակումը դիտարկվում է որպես ագրեսիա ՆԱՏՕ-ի մնացած բոլոր պետությունների դեմ։
