2019 թվականին ֆիզիկական անձանց տրամադրվող վարկերի աճի տեմպերը գերազանցում են բիզնես վարկավորման աճի տեմպերին: Այս մասին մամուլի ասուլիսում ասաց «Ամերիաբանկի» մանրածախ բանկինգի տնօրեն Արման Բարսեղյանը՝ ընդգծելով, որ բիզնես վարկավորման գծով աճ է դիտվել, բայց ոչ այնքան ակտիվ:
Նրա խոսքով՝ աճի նման տեմպերն ապահովվել են հիմնականում սպառողական եւ հիփոթեքային վարկերի հաշվին: «Հիփոթեքային վարկավորման աճի գործոնները բազմաթիվ են: Մասնավորապես՝ 2015 թվականին տնտեսության անկումից հետո ձեւավորվել են որոշակի «հետաձգված սպասումներ», հաջորդ 2-3 տարիներին շուկան պասիվություն է դրսեւորել: Հիմա այս բացը լրացվում է»,- հայտարարեց նա:
Երկրում տեղի ունեցած քաղաքական փոփոխությունները նաեւ անշարժ գույքի գների բարձրացման սպասումներ են ձեւավորել, ինչն իր հերթին նպաստել է հիփոթեքային վարկավորման աճին: Բնականաբար, մեծ դեր են խաղացել նաեւ օրենսդրական բարեփոխումները, որոնք նախատեսում են եկամտահարկի վերադարձ, ինչպես նաեւ շինարարության ոլորտի ակտիվացումը:
«Այսինքն՝ գործոնները անչափ շատ են, բայց այդ ամենը առողջ գործոններ են»,- հայտարարեց Բարսեղյանը: Նրա պարզաբանմամբ՝ հիփոթեքային վարկավորման աճն ապահովվել է ոչ ռիսկերի մեծացման հաշվին: Չնայած հիփոթեքային պորտֆելի 50-տոկոսանոց աճին, վարկերը տրամադրվել են աշխատանքով ապահովված մարդկանց, որոնք անշարժ գույք են ձեռք բերել առաջնային շուկայում:
Ինչ վերաբերում է բիզնես վարկերին, ապա Բարսեղյանի գնահատմամբ՝ իրական աճ պետք է սպասել հաջորդ տարի: «Բիզնեսի ներկայիս ակտիվությունը միայն սկիզբն է: Վիճակագրական տվյալները վկայում են, որ այս տարի մեծ թվով ձեռնարկություններ եւ մասնավոր ձեռներեցներ են գրանցվել, որոնք իրենց գործունեությունը փաստացի նոր են սկսում: Մենք ակնկալում ենք, որ հաջորդ տարի բիզնես վարկավորման գծով ռեալ ակտիվություն կզգանք, հնարավոր է՝ այդ տեմպերն անգամ կանցնեն ֆիզիկական անձանց վարկավորմանը»,- շեշտեց նա: