Հարկային բարեփոխումների ուժի մեջ մտնելը բարենպաստ ազդեցություն կունենա բանկային համակարգի վրա: Այս մասին մամուլի ասուլիսում ասաց «Ամերիաբանկի» մանրածախ բանկինգի տնօրեն Արման Բարսեղյանը:
Նրա խոսքով՝ բոլոր հարկային բարեփոխումները գործնականում մեղմում են հարկային ռեժիմը, հատկապես փոքր եւ միջին բիզնեսի համար, միկրոբիզնեսը, ըստ էության, նաեւ ընդհանրապես ազատվում է հարկերի վճարումից: Սա նշանակում է, որ կմեծանան բիզնեսի եկամուտները, ազատ միջոցներ կհայտնվեն բիզնեսի զարգացման համար, ինչ նպատակով կպահանջվեն նաեւ վարկային միջոցներ: Դրանից բացի, հարկերից միկրոբիզնեսի ազատումը կհանգեցնի նրան, որ միջոցները թաքցնելու անհրաժեշտությունը կվերանա: «Այս տրամաբանությամբ՝ ստվերից դուրս կբերվեն մեծ ծավալով միջոցներ: Սա բանկերի համար անչափ կարեւոր է, քանի որ մեր հետազոտությունները հիմնվում են ունեցած տեղեկությունների վրա, որքան ստվերը քիչ է, այնքան տեղեկությունները ստույգ են եւ համապատասխան ավելի որակյալ մեր ընդունած որոշումները»,- հայտարարեց Բարսեղյանը: Նա ընդունված բարեփոխումներն ընդհանուր առմամբ բարենպաստ է գնահատում, որոնք նոր հնարավորություններ են ընձեռում:
Մեկնաբանելով այն հարցը, թե բանկային համակարգն արդյոք զգո՞ւմ է ստվերային տնտեսության դեմ պայքարի որեւիցե արդյունքներ, Բարսեղյանը նշեց, որ «Ամերիաբանկում» գրանցվել է բանկային համակարգի միջոցով աշխատակիցներին աշխատավարձերի փոխանցումների կտրուկ աճ: «Այս առումով մեծ առաջընթաց կա, որը տեսնում ենք ըստ մեր ցուցանիշների»,- հայտարարեց նա: Դրանից բացի, փոխվել է նաեւ հայտարարագրված եւ չհայտարարգրված շրջանառությունների հարաբերակցությունը, բիզնեսներն ավելի թափանցիկ են դառնում:
Ստվերային տնտեսության դեմ գործընթացի վրա բարենպաստ կանդրադառնա նաեւ ԱԺ-ում օրինագծերի քննարկումը, որոնք սահմանափակում են կանխիկ միջոցներով գործարքները: «Այս օրենսդրական բարեփոխումների հանդեպ մեր վերաբերմունքը միանշանակ դրական է: Սակայն այս բարեփոխումները պետք է իրականացվեն ճիշտ ժամանակացույցով, որ անցումը հնարավորինս սահուն լինի, քանի որ ցանկացած դրական նախաձեռնություն կարող է խնդիրների հանգեցնել, եթե սխալ իրականացվի: Սակայն եթե դա սահուն կատարվի, այդ բարեփոխումներն աստիճանաբար միանշանակ դրական արդյունք կունենան»,- հայտարարեց նա:
