Google ընկերությունը նախատեսում է խստացնել կանոնները, որոնք վերաբերում են քաղաքական գովազդի տեղադրմանը։ Այս մասին ասվում է նրա կայքում հրապարակված հայտարարության մեջ, տեղեկացնում է ՏԱՍՍ-ը։
Ինչպես պարզաբանել են Google-ի ներկայացուցիչները, ընկերությունը մտադիր է միջոցներ ձեռնարկել իր պլատֆորմներում «քաղաքական գովազդի հանդեպ ընտրողների վստահությունն ամրապնդելու համար»։ Խոսքը հայտարարությունների մասին է, որոնք ցույց են տրվում Google-ի որոնողական սերվիսում եւ ընկերությանը պատկանող YouTube պորտալում, ինչպես նաեւ տեղադրվում են որոշ կայքերում։
Հայտարարությունում ընդգծվում է, որ Google-ը սահմանափակելու է ագիտացիոն նյութերի թարգեթավորումը օգտատերերի առանձին խմբերում։ Ընկերության ներկայացուցիչները նշում են, որ քաղաքական գովազդը կողմնորոշել կարելի է միայն հետեւյալ հատկանիշներով՝ օգտատերերի տարիքը, սեռը, ինչպես նաեւ գտնվելու վայրը։ Թույլատրելի կլինի այն գործելակերպը, որով ենթադրվում է նշված նյութերի ցուցադրում լսարանին ինչ-որ համատեքստով։ Օրինակ, այն անձանց, ովքեր ինտերնետում կարդում են հոդված տնտեսական թեմայով։
Նոր կանոններն ուժի մեջ կմտնեն Մեծ Բրիտանիայում մեկ շաբաթվա ընթացքում, Եվրամիության մյուս երկրներում՝ մինչեւ տարեվերջ։ Google-ը նշված նորմերը կկիրառի ամբողջ աշխարհում 2020 թվականի հունվարի 6-ից։
Ընկերությունը փաստում է, որ միջոցներ է ձեռնարկում նախապես կեղծ կամ մոլորության մեջ գցող տեղեկատվության տարածումը կանխելու համար, որը կվերաբերի ընտրություններին ամբողջ աշխարհում։ Ինչպես ասվում է հայտարարությունում, խոսքը կարող է վերաբերել, օրինակ, թեկնածուներից մեկի մահվան պնդումներին, ընտրությունների օրը տեղափոխելուն կան նրան, թե կարելի է քվեարկել՝ հաղորդագրություն ուղարկելով բջջային հեռախոսով։
Բացի այդ, Google-ը նշում է, որ հակազդելու է կեղծ տեսանյութերի տարածմանը, որոնք այնպես են ստեղծվել, որպեսզի նման լինեն թեկնածուների իսկական ելույթների տեսագրություններին։
Ընկերությունը խոստանում է, որ ավելի շատ տեղեկատվություն կտրամադրի քաղաքական գովազդի պատվիրատուների եւ այն մասին, թե ում են ուղղված եղել ագիտացիոն նյութերը, ինչ լսարան կարող էր տեսնել այն։ Ինչպես ասվում է հայտարարությունում, նշված տեղեկատվության մի մասը, որը վերաբերում է ընտրություններին ԱՄՆ-ում, ԵՄ-ում եւ Հնդկաստանում, արդեն հասանելի է օգտատերերին։ Դեկտեմբերի 3-ից Google-ը մտադիր է ընտրությունների մասին այդ տվյալները տրամադրել ամերիկյան նահանգների մակարդակով։
