Նոյեմբերի 21-ին ոստիկանության շտաբի պետ Արմեն Ղուկասյանն ընդունեց Հայաստանում Լեհաստանի Հանրապետության արտակարգ եւ լիազոր դեսպան Պավել Չեպլակին եւ Հայաստանում գտնվող Լեհաստանի արտաքին գործերի նախարարության պատվիրակությանը:
Ողջունելով հյուրերին` Արմեն Ղուկասյանը կարեւորեց ինչպես երկու պետությունների իրավապահների, այնպես էլ Հայաստանի ոստիկանության ու Եվրոպական միության միջեւ ձեւավորված փոխգործակցության բարձր մակարդակը՝ որպես օրինակ ներկայացնելով Եվրոպական Միության Արեւելյան գործընկերության ոստիկանական համագործակցության ծրագրի շրջանակներում Լեհաստանի Հանրապետության ՆԳՆ հետ իրականացված զգալի աշխատանքները։
Հյուրերը շնորհակալություն հայտնելով ջերմ ընդունելության համար՝ հետաքրքրվեցին Հայաստանի ոստիկանությունում ընթացող բարեփոխումներով։
Արմեն Ղուկասյանը ներկայացրեց ՀՀ ոստիկանությունում մշակվող զարգացման ռազմավարությունը, ինչպես նաեւ պարեկային շարժական ծառայության հիմնադրման եւ օպերատիվ կառավարման կենտրոնի արդիականացման ուղղությամբ տարվող աշխատանքները՝ կարեւորելով այդ գործում ՀՀ կառավարության կողմից եւ Եվրոպական միության ԹԱՅԵՔՍ ծրագրի շրջանակներում նախաձեռնած փորձագիտական վերլուծությունը, նաեւ անդրադառձավ Լեհաստանի ՆԳՆ Շիտնոյի եւ Հայաստանի ոստիկանության կրթահամալիրի համագործակցությանը։
Ուրվագծելով համագործակցության հետագա ուղղությունները՝ պատվիակության ներկայացուցիչները պատրաստակամություն հայտնեցին շարունակել աջակցությունը բարեփոխումների գործընթացին` Լեհաստանի լավագույն փորձի կիրառմամբ:
Հանդիպմանը քննարկվեցին փոխադարձ հետաքրքրություն ներկայացնող այլ հարցեր եւս։
