Միկրոբլոգների Twitter ծառայությունը թույլ կտա օգտատերերին թաքցնել իրենց գրառումների պատասխանները, հայտնում է ՌԻԱ Նովոստին։
«Որպեսզի ձեզ ավելի շատ վերահսկողություն տրամադրվի զրույցների վրա, մենք թեսթավորել ենք գործառույթ, որը թույլ կտա ձեզ թաքցնել Twitter-ում ձեր հաղորդագրությունների պատասխանները․․․ Այսօր մենք հասանելի ենք դարձնում այն ամբողջ աշխարհի մարդկանց համար»,- ասվում է կայքում հրապարակված հաղորդագրության մեջ։
Ընկերության տվյալներով, այս փոփոխությունները արվել են, որպեսզի օգտատերերն «իրենց անվտանգ եւ հարմարավետ զգան Twitter-ում շփումների ժամանակ»։
Նշվում է, որ նոր գործառույթի թեսթավորման ժամանակ ընկերությանը հաջողվել է պարզել, որ մարդկանց մեծամասնությունը թաքցնում է այն պատասխանները, որոնք համարում է անտեղի կամ զայրացնող։ Բացի այդ, մարդկանց հետաքրքիր է, թե ինչպես այդ գործառույթը կօգտագործեն հայտնի քաղաքական գործիչները կամ լրագրողները։
