Ամերիկյան Tesla ընկերությունը, որը մասնագիտացած է էլեկտրական ավտոմեքենաների ուղղությամբ, ուրբաթ լույս գիշերը ներկայացրել է իր նոր Cybertruck փիքափը՝ 1,5 տոննա բեռնատարողությամբ եւ 40 հազար դոլար արժեքով: Միջոցառման հեռարձակումը կատարվել է արտադրողի կայքում, փոխանցում է «ՌԻԱ Նովոստի»-ն:
«Այն նման չէ ուրիշ ոչ մի մեքենայի»,- հայտարարել է ընկերության հիմնադիր Իլոն Մասկը՝ ներկայացնելով ֆուտուրիստական դիզայնով անկյունաձեւ մեքենան:
Նրա խոսքով՝ նոր փիքափը գործառնական առանձնահատկություններով նման կլինի հանրահայտ բենզինային մոդել Ford F-150-ին: Մասկը հստակեցնում է, որ իր Cybertrack-ը նման է «ապագայից հետեւակի զրահապատ մեքենայի», եւ ընդհանրապես՝ դիզայնը կատարված է ըստ «Շեղբի վրայով վազողը» գիտաֆանտաստիկ ֆիլմի նմուշի, որի գործողությունները տեղի են ունենում 2019 թվականի նոյեմբերին:
Մասկի խոսքով՝ նոր բեռնատարը տառացիորեն անխոցելի է՝ դռների համար օգտագործվում է նույն համաձուլվածքը, ինչ SpaceX տիեզերական հրթիռների կառուցման ժամանակ: Մեքենայի հարվածակայուն ապակին կոտրել են ցուցադրության ժամանակ ուղղակի բեմում, սակայն Մասկը նկատել է, որ պողպատե գնդիկը, որի օգնությամբ դա արվել է, մի կողմ է թռչել եւ սրահի մեջ չի ընկել: