Հայաստանի ամորֆ քաղաքականությունը ձեռնտու է ադրբեջանական կեղծ քարոզչությանը: Այս մասին նշեց Հայաստանի առաջին օմբուդսմեն Լարիսա Ալավերդյանը՝ NEWS.am-ի խնդրանքով մեկնաբանելով Ադրբեջանի նախագահի հայտարարությունները:
«Քանի դեռ Հայաստանն իրեն այդքան պասիվ պահի, բացարձակապես այն բոլոր իրադարձությունները, որոնք ամբողջությամբ ապացուցում են, որ Ադրբեջանը հետեւողականորեն իրականացրել է ուղղակի ցեղասպանության ակտ՝ Սումգայիթից սկսած մինչեւ այսօր, կշարունակվեն: Ալիեւի հայտարարությունները պետք է դիտարկել հայկական կողմի բացարձակ պասիվության համատեքստում՝ լինեն նրանք պետական կառույցներ, քաղաքական գործիչներ, խորհրդարանականներ»,- հայտարարեց Լարիսա Ալավերդյանը:
Առաջին օմբուդսմենը շեշտեց, որ այս ռազմավարությունը 1915 թվականից հետո մշակել է դեռ Թուրքիան, եւ այն իրականացվում է. «Անհրաժեշտ է հասկանալ, որ Ցեղասպանության ժխտումը նոր ցեղասպանության ակտերի ծրագրում եւ իրականացում է: Ադրբեջանը փաստացի շարունակում է Թուրքիայի ավելի քան հարյուրամյա ռազմավարությունն ու մարտավարությունը: Ընդ որում՝ Հայաստանի կողմից չհանդիպելով որեւէ համարժեք դիմադրության եւ ակտիվ քաղաքականության: Սա կրկնվելու է, եւ սա միայն սկիզբն է»:
«Բոլորն ասում են՝ «ստի ոտքը կարճ է»: Այո, բայց կարճ տարածքում դա հաստատապես աշխատում է: Ուստի դիրքորոշումը, թե նրանց կեղծ ուղերձները, միեւնույն է, ձախողման են դատապարտված, իսկ նման մոտեցումը սկսվում է դեռեւս Հայաստանի առաջին նախագահից, իրականում ռեալ չի արտացոլում իրականությունը: Ակտիվ աշխատանքը՝ լինի կեղծիքի, հորինվածքի եւ առասպելների վրա հիմնված, միշտ տարածվում է, շահում, համենայնդեպս պատմական կարճ հեռավորությունում՝ 50-100 տարի: Մինչդեռ դա կարող է ճակատագրական լինել ամբողջ Հարավային Կովկասի ժողովուրդների համար»,- զգուշացրեց Լարիսա Ալավերդյանը՝ հավելելով, որ վերջին 1,5 տարում ամորֆ քաղաքականությունը եւ ամորֆ արտահայտությունները կարող են միայն ձեռնտու լինել ադրբեջանական կեղծ, բայց միանգամայն պարբերական քարոզչությանը:
