Նոյեմբերի 21-ին Երեւանում տեղի է ունեցել «ՀՀ բնական կերհանդակների՝ արոտավայրերի եւ խոտհարքների կայուն կառավարմանն ուղղված ծրագրերի համակարգման հարթակ»-ի 6-րդ աշխատաժողովը, որին մասնակցել են բնական կերհանդակների ոլորտին առնչվող գերատեսչությունների, ՀՀ Ազգային ժողովի, ինչպես նաեւ հասարակական, միջազգային եւ գիտական կառույցների ներկայացուցիչներ:
ՀՀ էկոնոմիկայի նախարարության կողմից աշխատաժողովին մասնակցել են «Համայնքների գյուղատնտեսական ռեսուրսների կառավարման եւ մրցունակության»
երկրորդ ծրագրի ղեկավար Արման Խոջոյանը, ծրագրի «Համայնքների արոտավայրերի/անասնապահության կառավարման համակարգ» բաղադրիչի համակարգող Կարեն Թորոսյանը, նախարարության շահագրգիռ ստորաբաժանումների աշխատակիցներ:
Աշխատաժողովը մեկնարկել է Հարթակի կազմի համալրման պաշտոնական արարողությամբ՝ Հարթակի նոր գործընկեր է դարձել «Անասնաբույժների ազգային ասոցիացիա» ՀԿ-ն:
Աշխատաժողովի ընթացքում Կարեն Թորոսյանը ներկայացրել է Ղրղզստանի Հանրապետության արոտավայրերի կայուն կառավարման փորձի ուսումնասիրման նպատակով տարբեր շահագրգիռ կառույցների ներկայացուցիչների համար կազմակերպված ուսոցողական այցի արդյունքները եւ դրանց առնչությամբ արված եզրակացությունները:
Այնուհետեւ «Ընդվայզ բիզնես եւ իրավաբանական խորհրդատվություն» ՍՊԸ ներկայացուցչի կողմից ներկայացվել եւ քննարկման է դրվել Հարթակի նախաձեռնությամբ եւ պետական, համայնքային եւ հասարակական կառույցների համագործակցության արդյունքում մշակված ՀՀ բնական կերհանդակների՝ արոտավայրերի եւ խոտհարքների կայուն կառավարման հայեցակարգի աշխատանքային տարբերակը:
Հայեցակարգի մշակումը եւ դրա հետագա ներառումը պետական քաղաքականության մեջ էական նշանակություն ունի համայնքների բնականոն զարգացման, հանրապետության բնապահպանական մարտահրավերների մեղմման եւ անասնապահության ոլորտի զարգացման համար:
Աշխատաժողովի ընթացքում տեղի ունեցած քննարկման արդյունքները կներկայացվեն շահագրգիռ կողմերին եւ համապատասխան դիտարկումները հաշվի կառնվեն հայեցակարգի վերջնական ձեւակերպման եւ հետագա քայլերի պլանավորման ընթացքում:
