ԱՄՆ հայկական պատվիրակության այցի նպատակը ոչ միայն Սենատի եւ Ներկայացուցիչների պալատի գործընկերների հետ հանդիպումն էր, այլ նաեւ ուղիղ շփումների հաստատումը նրանց հետ, քանի որ նոր կազմով առաջին այցն էր: Այս մասին նոյեմբերի 25-ին Ազգային ժողովում մամուլի ասուլիսի ժամանակ հայտարարեց «Իմ քայլը» խմբակցության ղեկավար Լիլիթ Մակունցը՝ ամփոփելով ԱՄՆ հայկական պատվիրակության այցի արդյունքները:
Նրա խոսքով՝ ձեւաչափը ներառում էր հանդիպումներ ոչ միայն կոնգրեսականների, այլ նաեւ փորձագետների հետ: «Հայ-ամերիկյան բարեկամության խմբի հիմնական նպատակը երկկողմ հարաբերությունների մակարդակի բարձրացումն է: Մենք առաջարկել ենք համագործակցել մարդու իրավունքների, ժողովրդավարական կառույցների ամրապնդման, կոռուպցիայի կանխարգելման ուղղությամբ: Մենք նաեւ Սենատի եւ Ներկայացուցիչների պալատի գործընկերներին առաջարկել ենք Հայաստանին աջակցող ակտ ընդունել»,- նշեց Մակունցը՝ հավելելով, որ այդ ամենը ենթադրում է որոշակի երկկողմ պարտավորություններ: