ՀՀ երկրորդ նախագահ Ռոբերտ Քոչարյանի փաստաբան Հովհաննես Խուդոյանը դատախազ Կարեն Բիշարյանի բացարկի մասին միջնորդություն ներկայացրեց:
Փաստաբանի խոսքով՝ դեռեւս 2018 թվականի փետրվարի 23-ին խորհրդարանում 2008 թվականի մարտի 1-ի իրադարձությունների վերաբերյալ քննարկումների ժամանակ Բիշարյանը հիմք չէր տեսնում Քոչարյանին հարցաքննելու համար, նույնիսկ վկայի կարգավիճակով: «Հետագայում դատախազը հանկարծ տեսավ հիմքեր կալանավորման համար: Չնայած նրան, որ մեղադրանքի համար հիմք դարձած հանգամանքները հայտնի էին նաեւ նախկինում. դա 0038 հրամանն է, արտակարգ իրավիճակի սահմանումը: Եվ նույնիսկ բարձրացվել է ԶՈւ ներգրավման հարցը: Դա խոսում է քաղաքական իրավիճակի փոփոխությունից հետո դատախազի սուբյեկտիվ վերաբերմունքի մասին»,- հայտարարեց փաստաբանը:
Փաստաբան Ռուբեն Սահակյանը հայտարարեց, որ դատախազի տեսակետի փոփոխությունը քաղաքական պատվերի հետեւանք է:
Նշենք, որ դատախազ Կարեն Բիշարյանը մասնակցում է գործընթացին այսօրվանից, ինչով եւ պայմանավորված է փաստաբանների գրավոր միջնորդության բացակայությունը:
Մեղադրող կողմը միջնորդության հետ չհամաձայնեց: Դատախազ Գեւորգ Բաղդասարյանը հայտարարեց, որ միջնորդությունը քաղաքականապես մոտիվացված է եւ անհիմն, ինչպես եւ նախորդ միջնորդությունները: «Հիմքեր չկան դատախազ Բիշարյանի օբյեկտիվությունը կասկածի տակ դնելու համար»,- հայտարարեց Բաղդասարյանը: Պետրոս Պետրոսյանը համաձայնեց իր գործընկերոջ հետ եւ նկատեց, որ գործի մի շարք հանգամանքներ հայտնի չեն եղել այն շրջանում, որին հղում են անում Ռոբերտ Քոչարյանի փաստաբանները: Մասնավորապես, 0038 հրամանի գոյության մասին հայտնի է դարձել ոչ այդքան վաղուց, եւ փաստաբանները փաստերի մանիպուլյացիայի են դիմում:
Տուժածի ներկայացուցիչ Պողոսյանը խոսք տվեց իրեն հարիր ոճով՝ ելույթը խառնելով նախկին նախագահի հասցեին վիրավորական արտահայտություններով: Նրա գործողություններին արձագանքեց փաստաբան Արամ Օրբելյանը՝ դատարանից պահանջելով միջոցներ ձեռնարկել: Դատավորը հերթական անգամ հիշեցրեց կոռեկտության սահմաններից դուրս չգալու անհրաժեշտության մասին:
Դատախազ Բիշարյանը նշեց, որ 2018-ի փետրվարի 23-ի վերոնշյալ քննարկումը եւ առաջադրված մեղադրանքը խիստ տարբերվում են, իսկ ներկայիս գործը չի դիտարկում մարդկանց մահվան հանգամանքները: Նրա խոսքով՝ տեսակետի փոփոխությունը չի կարող դիտարկվել որպես ոչ օբյեկտիվություն: «Ե՛վ այն ժամանակ, եւ՛ հիմա իմ կարծիքը հիմնված է գործի փաստացի տվյալների վրա»,- հայտարարեց դատախազը՝ վստահեցնելով, որ սուբյեկտիվ մոտեցում չի ցուցաբերում:
Խոսելով դատախազի այն հայտարարության մասին, թե 0038 հրամանի գոյության մասին հայտնի է դարձել ոչ այդքան վաղուց, փաստաբան Հովհաննես Խուդոյանը նշեց, որ այդ պնդումը ճիշտ է, սակայն հարցն այն է՝ ինչու քննությունն ավելի վաղ ջանքեր չի գործադրել բոլոր հանգամանքները պարզելու համար: «Այստեղ կարելի է խոսել քաղաքական կամքի բացակայության մասին, եւ դա փաստարկ է մեր օգտին»,- նշեց նա:
Լսելով կողմերին՝ դատավորը հեռացավ խորհրդակցական սենյակ որոշում կայացնելու համար: Որոշումը հայտնի կդառնա այսօր ժամը 17:45-ին: