ՀՀ երկրորդ նախագահ Ռոբերտ Քոչարյանի եւ մյուսների գործով դատական նիստում փաստաբանի եւ դատախազի միջեւ լեզվակռվի պատճառով ընդմիջում հայտարարվեց:
Հիշեցնենք, որ փաստաբան Պողոսյանը ներկայացնում է ՀԱՊԿ նախկին գլխավոր քարտուղար Յուրի Խաչատուրովի շահերը:
Լեզվակռիվը սկսվեց գործընթացում նոր դատախազ Կարեն Բիշարյանի բացարկի մասին փաստաբան Հովհաննես Խուդոյանի միջնորդության քննարկման ընթացքում:
Միհրան Պողոսյանը ներկայացրեց իր տեսակետը, երբ դատախազ Բաղդասարյանը սկսեց տեղից ռեպլիկներ անել: Դատախազի պահվածքը շփոթեցրեց փաստաբանին, եւ չնայած նրան, որ դատավոր Աննա Դանիբեկյանը փորձեց հանդարտեցնել կողմերին, փաստաբանն ու դատախազը անբարեհաճ դիտողություններ փոխանակեցին: Դատավորը շտապ ընդմիջում հայտարարեց եւ հեռացավ:
Լեզվակռվին միացան Ռոբերտ Քոչարյանի աջակիցներն ու հակառակորդները:
Վերադառնալով չծրագրված ընդմիջումից՝ դատավորը կողմերին արտահայտվելու հնարավորություն տվեց եւ զգուշացրեց, որպեսզի նման բան չկրկնվի:
Խոսք տալով՝ Միհրան Պողոսյանը դատավորին հիշեցրեց, որ ինքը ներկայացնում է ոչ թե Ռոբերտ Քոչարյանի, այլ Յուրի Խաչատուրովի շահերը եւ նաեւ հիշեցրեց, որ միջադեպը տեղի չէր ունենա, եթե մյուս կողմը հետեւեր կարգին եւ դիմեր դատավորին, այլ ոչ թե ելույթ ունենար տեղից:
Ի պատասխան՝ դատախազ Գեւորգ Բաղդասարյանը հայտարարեց, որ պաշտպանել է գործընկերոջը՝ Պետրոս Պետրոսյանին, եւ իրեն մեղավոր չի զգում:
Դատավորը համարեց, որ դատախազը խախտել է նիստի կարգը, փաստաբանն ու դատախազը չեն ենթարկվել լեզվակռիվն ավարտելու պահանջին եւ անհարգալից վերաբերմունք են դրսեւորել: Դատավորը նկատողություն արեց երկուսին էլ՝ հայտարարելով, որ միջադեպի մասին կհաղորդվի գլխավոր դատախազին եւ Փաստաբանների պալատին: