ԵՄ-ի հետ վիզայի ռեժիմի չեղարկման ուղղությամբ իրական ջանքերը կսկսվեն այն օրվանից, երբ սկսվի երկխոսությունը: Այս մասին ՀՀ-ԵՄ համաձայնագրի ստորագրման 2-ամյակին նվիրված ասուլիսի ժամանակ հայտարարել է ԱԳ նախարարի տեղակալ Ավետ Ադոնցը:
Նրա խոսքով՝ միեւնույն ժամանակ Հայաստանի գերատեսչությունները միակողմանիորեն իրականացնում են նախաձեռնությունը, որի նպատակն է պարզել վիզային ռեժիմի չեղարկման հարցի կապակցությամբ այս կամ այն երկրի դիրքորոշումը:
«Մենք այդ հարցը բարձրացնում ենք ԵՄ անդամ երկրների մայրաքաղաքներ այցերի ընթացքում, մենք արդեն 10 մայրաքաղաք ենք այցելել»,- հայտարարել է նա: Ադոնցը նշել է, որ Հայաստանը շատ բարձր է գնահատում վիզային ռեժիմի ազատականացման հարցով երկխոսության առնչությամբ եվրահանձնաժողովի դրական դիրքորոշումը:
«Մենք հուսով ենք, որ ԵՄ անդամ երկրները վիզային ռեժիմի ազատականացման հարցով կոնսենսուսի կհասնեն, եւ հուսով ենք, որ դա տեղի կունենա շատ շուտով: Պետք է ասեմ, որ մեր քաղաքացիներին չի բավարարում ԵՄ-ի հետ հեշտացված վիզային ռեժիմը»,- հավելել է նա:
