Արցախի ՊԲ մամուլի խոսնակ Սենոր Հասրաթյանը ոչ հերքում, ոչ էլ հաստատում է ադրբեջանական խոշոր դիվերսիոն ներթափանցման փորձի մասին տեղեկությունը։
Այս մասին NEWS.am-ին ասաց Սենոր Հասրաթյանը՝ խորհուրդ տալով հետևել ՊԲ պաշտոնական կայքին։ Նշենք, որ ՊԲ պաշտոնական կայքում այս պահին դիվերսիոն ներթափանցման փորձի մասին որևէ տեղեկություն չկա։
Ավելի վաղ NEWS.am-ը հաղորդել էր, որ Արցախի զինված ուժերը նախօրեին գիշերը կասեցրել են ադրբեջանական խոշոր դիվերսիոն ներթափանցման փորձ։
NEWS.am-ի տեղեկություններով՝ դիվերսիոն ներթափանցման փորձն իրականացվել է Մարտակերտի ուղղությամբ երկու խմբերով՝ 20 և 14 հոգուց բաղկացած։
Հայկական կողմը գործելով օպերատիվ, կանխել է հակառակորդի գործողությունները, ինչի արդյունքում սկսվել է ինտենսիվ փոխրաձգություն։ Ադրբեջանական կողմը տալով առնվազն մեկ ծանր վիրավոր, հետ է նահանջել, վիրավոր դիվերսանտին տանելով իրենց հետ։ Հայկական կողմից տուժածներ չկան։