ՄԱԿ Համաշխարհային պարենային ծրագիրը (ՀՊԾ) Հայաստանում Իտալիայի դեսպանության հետ համագործակցությամբ կազմակերպել է միջազգային համաժողով՝ նվիրված պարենամթերքի հարցում ներդրումների հնարավորությանը եւ գործարարության զարգացմանը։
Համաժողովը կազմակերպվել է իտալական խոհանոցի շաբաթվա շրջանակում։ Մասնավոր հատվածի ներկայացուցիչները եւ հայաստանցի, չինացի, ԵՄ, իտալացի ու ռուսաստանցի միջազգային փորձագետները կքննարկեն սննդամթերքների արտադրության համակարգերի ապագան, բնակչության առողջության վրա սննդամթերքների ազդեցությունը եւ ազգային ու միջազգային մթերային շուկայի պահանջմունքները։ Համաժողովը կանդրադառնա նաեւ այն հարցին, թե ինչպես կարող են տեխնոլոգիաները բարելավել պարենային անվտանգությունն ապագայում։
Միջոցառմանը մասնակցում են Հայաստանում ՄԱԿ Համաշխարհային պարենային ծրագրի ներկայացուցիչ Ելենա Միլոշեւիչը, Հայաստանում Իտալիայի Արտակարգ եւ լիազոր դեսպան Վինչենցո դել Մոնակոն, Հայաստանում Եվրամիության պատվիրակության ղեկավար, դեսպան Անդրեա Վիկտորինը, հանրապետության էկոնոմիկայի նախարար Տիգրան Խաչատրյանը։
