Թուրքիայի նախկին փոխվարչապետ Ալի Բաբաջանը զգուշացրել է «միանձնյա կառավարման» վտանգի մասին եւ ասել է, որ հույս ունի մինչեւ տարեվերջ քաղաքական նոր կուսակցություն ձեւավորել, որպեսզի մարտահրավեր նետի իշխող «Արդարություն եւ զարգացում» կուսակցությանը:
Բաբաջանը լքել է «Արդարություն եւ զարգացում» կուսակցությանը՝ նշելով «խորը տարաձայնությունների» մասին: Նա զբաղեցրել է էկոնոմիկայի նախարարի, ապա արտաքին գործերի նախարարի պաշտոնը նախքան փոխվարչապետ դառնալը: Այդ պաշտոնը նա զբաղեցրել է 2009-2015 թվականներին:
«Մենք տեսնում ենք, որ Թուրքիան մութ թունել է մտել, եւ երկրի խնդիրներն օրեցօր աճում են: Հետեւաբար, մենք նոր կուսակցություն ստեղծելու համար ջանքեր ենք գործադրել»,- ասել է նա HaberTurk-ին տված հարցազրույցում: Բաբաջանը որոշ չափով խուսափել է Էրդողանի հասցեին ուղիղ քննադատությունից, սակայն հայտարարել է, որ «միանձնյա կառավարումը» վնաս է հասցրել երկրին:
Թուրքիայում հաջորդ ընտրությունները կանցկացվեն 2023 թվականին: