Տեղեկությունն այն մասին, թե, իբր, ռուսական ORSIS («Պրոմտեխնոլոգիա») ընկերությունը ՀՀ ՊՆ-ից հրաձգային շուկայում մենաշնորհ է պահանջել՝ փամփուշտի գործարանի կառուցման դիմաց, չի համապատասխանում իրականությանը: Այս մասին ՌԻԱ Նովոստի-ին ասել է ընկերության գլխավոր տնօրեն Վլադիմիր Զլոբինը:
Ավելի վաղ հայկական մի շարք ԶԼՄ-ներում տեղեկություն է հայտնվել այն մասին, որ ORSIS ընկերությունն առաջարկել է Հայաստանում ռուսական ներդրումներով փամփուշտի արտադրության գործարան կառուցել: Դրա դիմաց ռուսական ընկերությունը, իբր, ՀՀ ՊՆ-ից 10 տարվա մենաշնորհ է պահանջել եւ մերժվել է:
«Ինչպես հայտնի է, ՊՆ-ի հետ բացառապես ռուսական ներդրումներով ORSIS փամփուշտի գործարան կառուցելու մասին բանակցություններ են ընթացել: Սակայն վերջին շրջանում մենք հայկական ԶԼՄ-ներում տվյալ հարցով շահարկումներ ենք տեսնում: Դա բացարձակ անհիմն է, հայկական կողմի հետ մեր բոլոր հանդիպումները գրանցված են արձանագրությամբ եւ նամակներով, մենք երբեւէ մենաշնորհ չենք պահանջել, չնայած նրան, որ ինչպես ցույց է տալիս համաշխարհային պրակտիկան, եթե ներդրողը ներդրումներ է կատարում արդյունաբերության ոլորտում, որն այդ երկրում դե-ֆակտո բացակայում է, ապա որոշակի արտոնություններ խնդրելու իրավունք ունի»,- ասել է Զլոբինը:
«Այդ իրավիճակով հետաքրքրվել են շատ քաղաքական գործիչներ, բիզնեսի ներկայացուցներ եւ՛ Ռուսաստանում, եւ՛ Հայաստանում: Մենք շփումներ ենք ունեցել ՌԴ-ում հայկական սփյուռքի երիտասարդ ներկայացուցիչների հետ, որոնք մեզ աջակցել են: Հուսով եմ՝ մոտ ապագայում արդյունավետ երկխոսություն կհաստատենք: Ստեղծված իրավիճակը մեզ զարմացնում է՝ հաշվի առնելով ՀՀ ԶՈւ-ի հետ մեր դրական փորձը, զենքի մատակարարումներն ու տեղի անձնակազմի վերապատրաստումը»,- ասել է նա:
Նրա խոսքով՝ «Քննչական կոմիտեում գործի քննությունը անարդարացիորեն երկար է տեւել՝ 4 ամիս, որի ընթացքում կոնկրետ կասկածյալի անուն չի նշվել, եւ գործը ձգձգվում է»:
ORSIS-ի պահանջով հետաքննությունը Քննչական կոմիտեից տեղափոխել են Հատուկ քննչական ծառայություն՝ հավելել է Զլոբինը: «Ինչպես հայտնի է, մենք երկու պաշտոնական հարցում ենք ուղարկել ՊՆ եւ մինչ այժմ պատասխան չենք ստացել: Նոյեմբերի 20-ին մենք Ռուսաստանում Հայաստանի դեսպանին խնդրել ենք հանդիպման հնարավորություն տալ եւ քննարկել այդ հարցը: Իրավաբանների պահանջով, որոնք ներկայացնում են Երեւանում մեր շահերը, այդ գործը ՔԿ-ից տեղափոխվել է ՀՔԾ: Դրա պատճառներից մեկն այն է, որ հայկական ռազմական գերատեսչության ղեկավարի հարազատներից մեկը ՔԿ բարձրաստիճան պաշտոնյա է»,- ասել է նա: