ՀՀ կառավարությունը ձգտում է բարձրացնել երկրում գյուղատնտեսական արտադրանքի որակը։ Այս մասին NEWS.am-ի թղթակցի հետ զրույցում հայտարարեց Հայաստանի էկոնոմիկայի նախարար Տիգրան Խաչատրյանը։
«Մենք աջակցում ենք ճիշտ սնվելու կարեւորության թեզիսը, քանի որ դա կապված է մարդու առողջության, կրթական գործընթացի արդյունավետության եւ աշխատանքի արտադրողականության հետ։ Այդ իմաստով իշխանությունների քաղաքականությունը կապված է գյուղատնտեսական շուկան որակյալ արտադրանքով ապահովելու եւ չափանիշները վերանայելու ձգտման, տնտեսվարող սուբյեկտների համար համապատասխան որակի արտադրանք տալու պայմաններ ստեղծելու հետ»,- նշեց նա։
Նրա խոսքերով, այս բոլոր օղակները կապված են առանձին հաստատությունների գործառույթների հետ, սակայն ընդհանուր ջանքերը պետք է ուղղված լինեն նրան, որպեսզի ապահովվի այնպիսի միջավայր, որտեղ արտադրողը կկարողանա առաջարկել այնպիսի որակի սնունդ, որը օգտագործելով՝ Հայաստանի քաղաքացին կկարողանա նվազեցնել առողջության հետ կապված խնդիրների ծագումը եւ բարձրացնել կյանքի մակարդակը։
Նշենք, որ նոյեմբերի 27-ին ՄԱԿ Պարենի համաշխարհային ծրագիրը Հայաստանում Իտալիայի դեսպանության հետ համատեղ կազմակերպել է միջազգային համաժողով՝ նվիրված սննդի արտադրության մեջ ներդրումների հնարավորություններին եւ ձեռներեցության զարգացմանը։
Միջոցառմանը մասնակցել են Հայաստանի էկոնոմիկայի նախարար Տիգրան Խաչատրյանը, Հայաստանում ՄԱԿ ՊՀԾ ներկայացուցիչ Ելենա Միլոշեւիչը, Հայաստանում Իտալիայի արտակարգ եւ լիազոր դեսպան Վինչենցո Դել Մոնակոն, Հայաստանում Եվրոպական միության պատվիրակության ղեկավար Անդրեա Վիկտորինը։
Համաժողովը կազմակերպվել էր իտալական խոհանոցի շաբաթվա շրջանակներում։