Renault խումբը Հռոմի Ֆրանցիսկոս պապին է հանձնել բացառիկ քրոսովեր՝ Dacia Duster։ Ամենագնացը կառուցվել է Dacia-ի ռումինական մասնաճյուղի անհատական պատվերով՝ Romturingia ատելիեի հետ համագործակցությամբ։ Dacia-ի հիմքի վրա ստեղծված «Պապամոբիլը» արտաքնապես տարբերվում է սովորական «Դասթերներից» ապակե վերնակառույցով եւ փոքրացված քլիրենսով, տեղեկացնում է Motor-ը։
Հովվապետի ամենագնացը փղոսկրի գույնի է եւ ունի մարմնագույն սրահ։ Հատուկ Հռոմի պապի համար Duster-ում հետին նստելատեղը կաշվից է, բայց ավելի մեծ հարմարավետությամբ, իսկ տանիքին մեծ լյուկ կա արարողակարգային միջոցառումների համար։
Հռոմի կաթոլիկ եկեղեցու հովվապետի նոր մեքենան հանձնել է Ռումինիայում Renault խմբի ղեկավար եւ Dacia-ի գլխավոր տնօրեն Քրիսթոֆ Դրիդին, ինչպես նաեւ կոնցեռնի իտալական մասնաճյուղի թոփ մենեջեր Քսավիե Մարտինեն։
Dacia ընկերությունը չի նշում «Պապամոբիլի» տեխնիկական բնութագրերի մասին. արտադրողը սահմանափակվել է հայտարարությամբ, որ ամենագնացի ճանապարհային լուսաշերտը փոքրացվել է 30 միլիմետրեով սրահում հարմարավետության համար։ Դատելով արտաքին տեսքից՝ որպես հիմք վերցվել է եվրոպական «Դասթերի» բենզինային թոփ տարբերակը՝ 150 ձիաուժ շարժիչով, 1,3 լիտր ծավալով։
Հռոմի պապը հայտնի է իր համեստությամբ եւ ճգնավորի մոտեցմամբ տրանսպորտին։ Ի տարբերություն իր նախորդների, որոնք օգտագործում էին Mercedes-Benz եւ Range Rover, ինչպես նաեւ հատուկ լիմուզիններ, Ֆրանցիսկոս պապը խնայողական մեքենաներով է երթեւեկում։ Առօրյա կյանքում հովվապետն օգտագործում է Ford Focus, հանդիսավոր դեպքերում նախընտրում է Jeep Wrangler, Nissan NP300 կամ Fiat 500L։
2017 թվականին Volkswagen կոնցեռնը Հռոմի պապին նվիրեց Lamborghini Huracan սպորքար։ Հովվապետն ընդունեց շքեղ նվերը, օծեց այն, դրեց իր ինքնագիրն ու եկեղեցուն հանձնարարեց կուպեն աճուրդի հանել։ Huracan-ից ստացված 715 հազար եվրոն ուղարկվեց բարեգործության նպատակների։