Հանքերի համար սարքավորումների եւ տեխնիկայի ներմուծումից Ղազախստանի կողմից չվճարված մաքսատուրքերի գումարը կազմում է գրեթե 30 մլն դոլար: Նշված գումարը չի բաշխվել եւ չի փոխանցվել ԵՏՄ անդամ պետությունների բյուջեներ, ինչը հաստատված կարգի խախտում է: Այս մասին լրագրողների հետ զրույցում ասաց աուդիտորական պալատի նախագահ Լեւոն Յոլյանը:
Նրա խոսքով՝ Հայաստանին եւ Ղրղզստանին վերաբերվող մաքսատուրքերի բաշխման հարցը որոշվել է ԵՏՄ դատարանի կողմից՝ հաշվի առնելով հայկական կողմի տեսակետը, իսկ Ղազախստանի հարցը բաց է մնում: «Ղազախական կողմի փաստարկները հիմնավոր չեն, եւ ռուսական կողմը հայտնել է մյուս 4 երկրների դիրքորոշումը: Հավանաբար, որոշում կկայացվի ԵՏՄ անդամ երկրների ղեկավարների մակարդակով»,- հավելել է նա:
Յոլյանը նշել է, որ վերջին երկու տարում երկրների բյուջեներ մաքսատուրքերից գումարների բաշխման խնդիրները քչացել են:
Նշենք, որ Երեւանում նոյեմբերի 28-ին կայացել է ԵՏՄ ֆինանսական վերահսկողության բարձրագույն մարմինների կոլեգիաների համատեղ նիստը: