Հայաստանի դրական սալդոն 2018 թվականին ԵՏՄ անդամ պետությունների բյուջեների միջեւ ներկրվող մաքսատուրքերի բաշխման արդյունքում կազմել է 37,6 մլն դոլար։ Այս մասին լրագրողների հետ զրույցում նոյեմբերի 28-ին ասաց Հաշվեքննիչ պալատի անդամ Արա Նռանյանը։
Նրա խոսքով՝ աճը 2018 թվականին, 2017-ի ցուցանիշների համեմատ, կազմել է մոտ 25 տոկոս։ «Բելառուսը եւ Ռուսաստանը վճարում են ավելի շատ մաքսատուրք, քան հետ են ստանում։ Ղազախստանը, Հայաստանը եւ Ղրղզստանը, ընդհակառակը, ավելի քիչ են վճարում, քան ստանում են։ Վեճերը, թե որ երկիրն ինչքան պետք է ստանա, միշտ ընթանում են, եւ ամեն բան կախված է հաշվարկի մեթոդաբանությունից, բայց ամեն դեպքում Հայաստանը շահում է»,- նշել է նա՝ ավելացնելով, որ 2019-ի հաշվետվությունը պատրաստ կլինի 2020 թվականին։
Նռանյանը նշեց, որ եթե մաքսատուրքերն աճեն, ապա, բնականաբար, կաճի նաեւ ընդհանուր բյուջեն։ «Այստեղ խնդիրն այն է, որ տնտեսությունը պետք է պատրաստ լինի նոր պայմանների։ Եթե Հայաստանի համար տուրքերը միայն ֆիսկալ գործիք են, ապա ԵՏՄ-ում դրանք հանդես են գալիս որպես կարգավորող մեխանիզմ ողջ միության շրջանակում»,- ամփոփել նա։
Նշենք, որ Երեւանում նոյեմբերի 28-ին տեղի է ունեցել ԵՏՄ ֆինանսական վերահսկողության բարձրագույն մարմինների կոլեգիաների համատեղ նիստը։
