Մենք որոշեցինք դիմել ԱԺ նախագահին՝ Ապրիլյան դեպքերի վերաբերյալ քննիչ հանձնաժողովի գործունեության ժամկետը 6 ամսով երկարացնելու խնդրանքով: Այս մասին այսօր՝ նոյեմբերի 28-ին, ԱԺ-ում լրագրողների հետ զրույցում նշեց ԱԺ Ապրիլյան պատերազմի հանգամանքներն ուսումնասիրող քննիչ հանձնաժողովի նախագահ Անդրանիկ Քոչարյանը:
«Մենք չենք տեղավորվում 6-ամսյա ժամկետի մեջ՝ հաշվի առնելով նյութերի ծավալը եւ մարդկանց հսկա քանակը: Հիմա մե բուռն գործունեության փուլն է եւ մենք կանգնելու իրավունք չունենք: Օրենքը թույլ է տալիս մինչեւ 6 ամիս երկարացնել ժամկետը մենք նշել ենք 6 ամիս, բայց դա չի նշանակում, որ այդքան կաշխատենք: Արդեն պարզ է, որ ավելի շուտ կավարտենք»,-ասաց նա:
Հարցին, թե ցանկում դեռ քանի մարդ է մնացել, որ պետք է հրավիրեն, Քոչարյանը պատասխանեց. «Բավականին շատ, բայց քանի որ մենք մեր պլանավորման մեջ հերթականությունը եւ հրավիրյալների տեմպը մեծ է լինելու, կհասցնենք բոլորին լսել: Բայց ամբողջ խնդիրն այն է, որ լսելուց հետո անհրաժեշտություն է առաջանում ինչ-որ նյութերի էլի ծանոթանալ:
Մենք կարծես մոտ ենք խորհրդատուների հրավիրմանը հասնելուն: ԱԱԾ-ն արդեն այդ հնարավորությունը կարծես տալիս է մեզ, իրավական խնդիրները հարթված են»,-ասաց նա:
