Գլխավոր դատախազ Արթուր Դավթյանը այսօր՝ նոյեմբերի 29-ին, անդրադարձել է «Մարտի 1»-ի գործով դատական նիստի ընթացքում Յուրի Խաչատուրովի պաշտպան Միհրան Պողոսյանի և դատախազ Գևորգ Բաղդասարյանի միջև վիճաբանությանը։
Լրագրողների հետ զրույցում Դավթյանը, մասնավորապես, ասաց․ «Ես մշտապես եմ հակված եղել, որ մեր աշխատանքում էմոցիաներից պետք է զերծ մնանք։ Բայց ուզում եմ հասկանաք, որ դատախազն էլ է մարդ և երբ դիմացից լկտի պրովոկացիա է արվում, կարծում եմ՝ դրան երբեմն համարժեք պատասխան պետքէ տրվի»։
Հարցին՝ հնարավո՞ր է առաջիկայում իրեն տեսնենք մեղադրանքը պաշտպանելիս, Դավթյանն ասաց․ «Ես կարծում եմ, որ վաղուց մեզ համար դա աննախադեպ չէ և ինձ կարող եք ամեն տեղ էլ տեսնել։ Ես միայն աշխատասենյակում աշխատող դատախազ չեմ»։
Հիշեցնենք, որ Ռոբերտ Քոչարյանի և մյուսների գործով նիստի ընթացքում ընդհարում տեղի ունեցավ Միհրան Պողոսյանի և Գևորգ Բաղդասարյանի միջև։
Միհրան Պողոսյանի ելույթի ժամանակ Գևորգ Բաղդասարյանը ցանկացավ առարկել, որին ի պատասխան՝ Միհրան Պողոսյանը հորդորեց չընդհատել իրեն, ինչի հետևանքով ընդհարում տեղի ունեցավ։ Երևանի ընդհանուր իրավասության դատարանում դատավոր Աննա Դանիբեկյանը նկատողություն արեց Յուրի Խաչատուրովի պաշտպան Միհրան Պողոսյանին և դատախազ Գևորգ Բաղդասարյանին։
