Ժնեւում ընթացող ազգային փոքրամասնությունների հարցով ՄԱԿ-ի ֆորումին թույլ չեն տվել մասնակցել Ղրիմի թաթարներին եւ հայերին: Այս մասին հայտնել է Ռուսաստանի եւ Ղրիմի հանրային պալատների անդամ, Ղրիմի տարածաշրջանային բուլղարական ազգային-մշակութային ինքնավարության ղեկավար Իվան Աբաժերը, հաղորդում է ՌԻԱ Նովոստին:
«Ղրիմի թաթարական եւ հայկական համայնքների ներկայացուցիչները ցանկացել են մասնակցել ֆորումին եւ զեկույցներ ներկայացնել, սակայն նրանք միջոցառմանը մասնակցելու իրավունք չեն ստացել կազմակերպիչներից: Վերջիններս մերժել են նրանց ելույթ ունենալ այդ հարթակում»,- պատմել է նա:
Նրա խոսքով՝ ինքը եւ Ղրիմի ուկրաինական համայնքի ղեկավար Անաստասիա Գրիդչինան գրանցվել են ֆորումին մասնակցելու համար: Նրանք համապատասխան փաստաթղթեր են ներկայացրել Շվեյցարիայի դեսպանատուն վիզա ստանալու համար, սակայն վիզա տրամադրվել է միայն Գրիդչինային:
«Ինձ ամենից շատ վրդովվեցնում է այն փաստը, որ Արեւմուտքը մտացածին պատժամիջոցներով արգելափակում է ղրիմցիների մուտքը Եվրոպայի երկրներ եւ ԱՄՆ: Դա մարդու իրավունքների խախտում է: ՄԱԿ-ի բանաձեւերում մշտապես ասվում է Ղրիմում թաթարների եւ ուկրաինացիների իրավունքների խախտումների մասին: Մեզ չեն թողնում ելույթ ունենալ այդ հարթակներում, նրանք այդպիսով այս կամ այն բանաձեւ ձեւակերպում են իրենց ցանկությամբ»,- նշել է Աբաժերը: