Գեներալների բիզնես շահերը խոչընդոտում են Բանակում ինովացիաների առաջխաղացմանը, իսկ այդ հակազդման արդյունքը հարյուրավոր հայ զինվորների կյանքերն են: Այդ մասին «Արդյունաբերական հեղափոխության ինովացիոն ուղի» 7-րդ բիզնես-ինովացիոն ֆորումի (BIF-2019) ժամանակ հայտարարել է «e-Hayq» ընկերության ղեկավար Վահագն Պողոսյանը:
«Մենք չենք ասում, որ այս կամ այն սպառազինությունը պետք չէ, մենք ասում ենք, որ անհրաժեշտ են նոր սպառազինություններ»,-նշել է նա: Պողոսյանն ընդգծել է, որ ինովացիաների համալիր կիրառումը կարող է հանգեցնել երկընտրանքի՝ ինչ անել արդեն առկա ինովացիաների հետ: Սակայն կան ինովացիաներ, որոնք ենթադրում են նոր ստորաբաժանումների ստեղծում, եւ այդ ժամանակ նմանօրինակ երկընտրանք չի լինի: Մյուս կողմից, նշել է Պողոսյանը, կան որոշակի նորարարություններ, որոնք պետք է կիրառվեն պարտադիր կարգով, կան ոլորտներ, որտեղ անհրաժեշտ է հրաժարվել հին մեթոդներից: «Ո՞վ է ասել, որ մեր զինվորն առնետի նման պետք է նստի խրամատներում եւ սպասի, որ թուրքը պետք է ակտիվություն ցուցաբերի: Դրա համար կա համապատասխան տեխնիկա»,-հայտարարել է նա՝ մանտանշելով սենսորային սարքավորումներն ու անօդաչու թռչող սարքերը: Պողոսյանը ցավով նշել է, որ այդ խնդրի լուծման մեջ առաջընթաց չկա, քանի որ «գտնվում է բիզնես շահերի տարածքում ամբողջը՝ վառելիքից սկսած, այդ երեխաների համար նախաճաշով վերջացրած, առնչվում է ինչ-որ մեկի շահերին, ուր էլ գնաս, կբախվես ինչ-որ մեկի շահերին եւ կառաջանա անհամաձայնություն»: Պողոսյանը հավելել է, որ ինովատորները բնականաբար կարող են պայքարել շփման գծից 20 կմ հեռավորության վրա վերահսկողության եւ պաշտպանության խնդիրը լուծելու համար, սակայն նա համոզված է, որ դա անիմաստ է, քանի որ նախաձեռնությունները պարտադիր կերպով կբախվեն «իրենց բիզնես շահերն ունեցող գեներալների» կողմից հակազդմանը: