Ես կարծելու իրավունք չունեմ, ես պետք է վստահեմ իրավապահ համակարգին, երբ սկսենք վստահել, մենք էլ կդառնանք այն երկրներին, որոնց քաղաքացիները վստահում են ցանկացած պաշտոնյայի: Այս մասին, այսօր՝ դեկտեմբերի 2-ին, Աբովյան քաղաքում գտնվող ադամանդագործական ընկերության նոր արտադրամասի բացման արարողության ժամանակ լրագրողների հետ զրույցում նշեց «Սիլ» կոնցեռնի ղեկավար, հայտնի գործարար Խաչատուր Սուքիասյանը:
«Իհարկե, այսօր պաշտոնյաներ կան, որոնք չեն համապատասխանում, թույլ են, կան պաշտոնյաներ, որոնք փայլուն կատարում են իրենց աշխատանքը, կան պաշտոնյաներ, որոնք նման են սովորական մարդկանց, եւ կան ձախողվածներ: Սա փաստ է»,-ասաց նա:
Անդրադառնալով նոր արտադրամասի բացմանը, Սուքիասյանը նշեց. «Այստեղ «Սիրիուս» գործարանն է եղել, որը միութենական նշանակության էլեկտրոնային արդյունաբերության գործարան է եղել: Ես աշխատել եմ 14 տարի այստեղ: Երբ ես Սերժ Սարգսյանին ասում էի, որ «Սիրիուս»-ում եմ աշխատել, սխալ բան են անում, ինքը տարօրինակ ինչ-որ բաներ էր ասում:
Ժամանակին ուզում էինք այստեղ 3 գործարաններից կաղապարների պատրաստման հաստոցները հավաքեինք, որի արդյունքում կաղապարներ կպատրաստվեին այնպիսի գործարանների համար, որոնք մինչեւ մեկ մլն տոննա տաբեր տիպի պլաստմասներ են օգտագործում: Հետո այնպիսի մի չգիտեմ ինչ սարքեցին 1998 թվականին, որ մարդիկ փախան երկրից»,- ասաց գործարարը:
Նա նաեւ հավելեց, որ օրերս ընդունել է արտերկրից եկած մարդկանց, որոնք զբաղվում են ադամանդագործությամբ. «Երկար զրուցել ենք իրենց հետ: Իրենցից եղան մարդիկ, որ ասացին՝ տարիներ առաջ եղել են այստեղ, պատմում էին, թե ինչ է եղել, երբ եկել ու ցանկացել են գործարան հիմնել այստեղ:
Բոլորն ուզեցել են փայ մտնեն, որ դուռը գնացել են, ուզեցել են խոսեն, պայմանավորվեն, որ գան ՀՀ-ում նույն գործող զբաղվեն, տարբեր պայմաններ են դրել: Անուն չեմ տա, որովհետեւ չի կարելի: Ես ուզում եմ, որ Հայաստանում ամեն ինչ թափանցիկ լինի»:
Նա նաեւ ընդգծեց, որ այս գործարանի տարածքի անգամ առաստաղների մետաղները, հաստոցները կռանով պոկել, տարել վաճառել են. «Հիմա այդ գործարանի տարածքում ոչ մի բան չկա, անգամ անասուն չեն կարող պահել: Սեփականատերը Սերժ Սարգսյանի գյուղից է»:
Նկատենք, որ նախկինում Խաչատուր Սուքիասյանը երբեք նման հայտարարություններով հանդես չի եկել:
