Մի ավիաընկերություն արդեն Հայաստանի Քաղաքացիական ավիացիայի կոմիտեի քննարկմանն է ներկայացրել հայտ Ազգային ավիափոխադրող դառնալու իրավունք ստանալու մասին: Այս մասին դեկտեմբերի 3-ին ԱԺ նիստում «Պետական տուրքի մասին» օրենքում լրացումներ կատարելու մասին օրինագծի քննարկման ժամանակ ասաց Հայաստանի Քաղաքացիական ավիացիայի կոմիտեի ղեկավար Տաթեւիկ Ռեւազյանը:
Նա այնուհետեւ ներկայացրեց քննարկվող օրինագիծը, որով առաջարկվում է նոր եւ Հայաստանում արդեն գործող ավիափոխադրողներին հարկային արտոնություններ տրամադրել տուրիստական նոր ուղղություններ բացելու դեպքում: Խոսքը, մասնավորապես, այսպես կոչված՝ «օդի հարկի» չեղարկման մասին է, որը հետագայում մտել է տոմսի արժեքի մեջ:
Հարկային արտոնությունն ավիաընկերություններին կտրամադրվի 3 տարով:
Ռեւազյանի կարծիքով՝ սա թույլ կտա մեծացնել երկրի ներդրումային գրավչությունը եւ նոր աշխատատեղեր ստեղծել:
