Հայաստանի եւ Ղազախստանի միջեւ առեւտրատնտեսական համագործակցությունը չի համապատասխանում առկա ներուժին։ Այս մասին դեկտեմբերի 3-ին «Ղազախստան-Հայաստան. հնարավորությունների արտահանում» միջոցառման շնորհանդեսին ասաց Հայաստանի էկոնոմիկայի նախարարի խորհրդական Վահագն Լալայանը։
Նրա խոսքով՝ առեւտրատնտեսական հարաբերությունների ինտենսիվացման հիմնական բաղադրիչ պետք է դառնա փոխադարձ արտահանական առեւտրի զարգացումը։
Լալայանն ընդգծեց, որ այս հարցում հիմնական խնդիրներն են ապրանքների սահմանափակ տեսականին եւ երկրների սահմանափակությունը, որոնց հետ երկու երկրները առեւտուր են անում։
«Խնդիրների լուծման ուղիները պետք է փնտրել ընդհանուր մոտեցումների կիրառման մեջ՝ ուղղված բիզնեսի համար նոր հնարավորությունների ստեղծմանը։ Անհրաժեշտ է դիվերսիֆիկացնել արտահանման շուկաները եւ ընդլայնել դրանք»,- ավելացրել է նա։
Էկոնոմիկայի նախարարի խորհրդականը վստահություն է հայտնել, որ տնտեսական շահը միավորում է երկրներին եւ ժողովուրդներին ավելի ամուր, քան այլ բաղադրիչները։
Նա նաեւ նշել է ԵՏՄ շրջանակում համագործակցության կարեւորությունը, որը նոր հնարավորություններ է բացում բիզնեսի համար։
«Դրան կարող են նպաստել նաեւ Վիետնամի, Սինգապուրի, Իրանի հետ ԵՏՄ համապատասխան համաձայնագրերը»,- ավելացրել է Լալայանը։
Նա ընդգծել է, որ Հայաստանը նպաստավոր առեւտրային ռեժիմներ ունի ԵՄ-ի, ԱՄՆ-ի եւ այլ երկրների հետ, ինչը կարող է լրացուցիչ հնարավորություններ ստեղծել բիզնեսի համար։