Վաճառքի ծավալով հարավկորեական ամենախոշոր ավտոարտադրող Hyundai Motor ընկերությունը մինչեւ 2025 թվականը արտադրության զարգացման գործում կներդնի 61 տրլն վոն (51 մլրդ դոլար)։ Այս մասին ասվում է ընկերության՝ չորեքշաբթի հրապարակված ուղեցույցում, տեղեկացնում է ՏԱՍՍ-ը։

Ծավալուն ներդրումների նպատակը գոյություն ունեցող բիզնեսի մրցունակության բարձրացումն է եւ նոր հնարավորությունների ստեղծումը՝ ի հաշիվ ներդրումների ապագայի տեխնոլոգիաներում։ Մասնավորապես, 20 տրլն վոն (17 մլրդ դոլար) կծախսվի անվարորդ եւ էլեկտրական մեքենաների արտադրության կատարելագործման համար։

Ընկերությունը նաեւ նշում է, որ մինչեւ 2025 թվականը նախատեսում է ներկայի 5 տոկոսից մինչեւ 8 տոկոսի բարձրացնել օպերացիոն շահույթի գործակիցը։