Menlo Park-ի ավտոտնակից Google-ի գործարկումից ավելի քան 20 տարի հետո Լարի Փեյջը եւ Սերգեյ Բրինը՝ ինտերնտետ հսկայի հիմնադիրները, որ միլիարդատերեր են դարձել, հեռանում են իրենց ղեկավար պաշտոնից Alphabet մայր ընկերությունում, տեղեկացնում է RG-ն։
Փեյջը եւ Բրինը հեռանում են գլխավոր տնօրենի եւ նախագահի պաշտոններից՝ համապատասխանաբար։ Google-ի ներկա գլխավոր տնօրեն եւ ընկերության բազմամյա գործադիր տնօրեն Սունդար Փիչայը կզբաղեցնի Alphabet-ի գլխավոր տնօրենի պաշտոնը՝ ի հավելումն իր ներկա պաշտոնի։
Փիչայը Google-ի գլխավոր տնօրենի պաշտոնն զբաղեցրել է 2015-ին ընկերության գործունեության վերակառուցման շրջանակում, որը հանգեցրել է Alphabet-ի ստեղծմանը։ Բրինը եւ Փեյջն արդեն ակտիվորեն կմասնակցեն Google-ի գործունեությանը որպես նրա տնօրենների խորհրդի անդամներ, բաժնետերեր եւ համահիմնադիրներ։ Նրանք նաեւ ասել են, որ նախատեսում են կանոնավոր խորհրդակցություններ անցկացնել Փիչայի հետ։
«Մենք երբեք չենք մնացել ղեկավար պաշտոններում, երբ մտածել ենք, որ կա ընկերությունը կառավարելու ավելի լավ միջոց։ Իսկ Alphabet-ին եւ Google-ին երկու գլխավոր տնօրեն եւ նախագահ պետք չեն»,- գրել են Փեյջն ու Բրինը Google-ի տնօրենների խորհրդին ուղղված նամակում։ Փեյջն, օրինակ, ավելի վաղ էր որոշակի չափով հեռացել հրապարակային գործունեությունից։
Համահիմնադիրները կշարունակեն աշխատել Alphabet-ի տնօրենների խորհրդում, տեղեկացնում է CNN-ը։ Նրանք կարող են պահպանել նաեւ ընկերության վերահսկողությունը քվեարկության օգնությամբ (նրանց է պատկանում կոնցեռնի բաժնետոմսերի մեծ մասը)։ Ինչպես նշում են փորձագետները, դա գրեթե երաշխավորում է ընկերության երկու հիմնադիրներին՝ ապագայում Alphabet-ի գործունեության ուղղության վրա ազդելու կարողությունը։