Ես բարեկամաբար խորհուրդ եմ տալիս պարոն Ծառուկյանին աշխատանքից հեռացնել գրանցված ու չգրանցված բոլոր այն մարդկանց, ում ինքը վճարում է, որովհետեւ իր փողերը վատնվում են: Այս մասին, այսօր՝ դեկտեմբերի 4-ին, ԱԺ-ում իր ելույթում հայտարարեց «Իմ քայլը» խմբակցության պատգամավոր Քրիստինե Պողոսյանը:
Նա ընդգծեց, որ ավարտել է Պոլիտեխնիկ համալսարանը, հայրը ճարտարապետ-շինարար է եւ փոքր տարիքից տանը լսել է շինարարության մասին:
«Երբ տեղեկություն են տրամադրում պարոն Ծառուկյանին միտումնավոր, թե գիտելիքների պակասից, որի հրապարակման արդյունքում մեղմ ասած անհարմար իրավիճակի մեջ է հայտնվում այդ մարդը, եւ ստացվում է, որ չի տիրապետում իրավիճակին, դրա արդյունքը սա է: Իզուր գումար եք տալիս, պարոն Ծառուկյան»,-ասաց պատգամավորը:
Նա անդրադարձավ այսօր Գագիկ Ծառուկյանի կողմից հրապարկված փաստաթղթին՝ նշելով. «Ուրեմն ԱՊԶ-ն, ասել է թե՝ ճարտարահատակագծային առաջադրանքը տրվում է նախագծին: Ոչ ոք նախագծին թույլտվություն չտալու իրավունք չունի: Այդ նույնն է, որ մարդուն ասես՝ չեմ տեսնում ինչ ես սարքում, բայց թույլ չեմ տալիս: Պետք է թույլտվություն լինի նախագծի, նախագիծը լինի եւ արդեն նախագծի հիման վրա պարզ լինի, կարելի՞ է շինթույլտվությունը տալ, թե չի կարելի: ԱՊԶ-ն դրական արդյունք է ստացել, իսկ այն, ինչ դրանից հետո է եղել, այլ է: Ի դեպ, հոկտեմբերի 30-ին բացասական եզրակացություն է ստացել տեսչական մարմնում, ինչի պատասխանը դուք այդպես էլ չեք վերցրել: Այս ամենի արդյունքն է նաեւ, որ Կոտայքում, Աբովյան քաղաքում 13 շենքեր ապօրինի կառուցվել են եւ հիմա դատական պրոցեսի մեջ են: Դրա արդյունքն է, որ Հրազդանի ճոպանուղու հետ այդքան խնդիրներ են ու էլի դատական գործեր են: Պարոն Ծառուկյանի փողերն իզուր քամուն եք տալիս: Այդ մեծ բանակն աշխատանքից հանեք եւ մի նորմալ մարդ աշխատանքի ընդունեք»,-հայտարարեց Քրիստինե Պողոսյանը:
