Ռուսաստանը հանդես է գալիս տիեզերքի ռազմականացման դեմ, սակայն ընթացիկ պայմաններում անհրաժեշտ է ուշադրություն դարձնել ուղեծրային խմբավորման ամրապնդմանը, ռազմական թեմայով ժողովի ժամանակ հայտարարել է ՌԴ նախագահ Վլադիմիր Պուտինը, հայտնում է ՌԻԱ Նովոստին։
«Ռուսաստանը միշտ հետեւողականորեն հանդես է եկել եւ հանդես է գալիս տիեզերքի ռազմականացման դեմ։ Միաժամանակ, իրավիճակի զարգացումը մեզնից պահանջում է մեծ ուշադրություն դարձնել ուղեծրային խմբավորման ամրապնդման վրա, ինչպես նաեւ հրթիռա-տիեզերական ոլորտի վրա ընդհանրապես»,- ասել է Պուտինը։
«Աշխարհի առաջատար երկրները ակտիվորեն զարգացնում են ռազմական եւ երկակի նշանակության ժամանակակից տիեզերական համակարգերը, լրացնում եւ կատարելագործում են դրանց տեխնիկական բնութագրերը։ Իսկ ԱՄՆ ռազմաքաղաքական ղեկավարությունն ընդհանրապես տիեզերական տարածքը բացահայտ դիտարկում է որպես ռազմական գործողությունների թատերաբեմ»,- հավելել է նա։
Նրա խոսքերով, ԱՄՆ-ը տիեզերքում ծրագրում է ռազմական գործողություններ։ «Այդ ոլորտում ռազմաքաղաքական առավելության համար ԱՄՆ-ը արագացված ստեղծում է տիեզերական ուժեր, որոնք առաջադրված խնդիրների շրջանակներում արդեն անցկացնում են օպերատիվ նախապատրաստման միջոցառումներ»,- ասել է ՌԴ նախագահը։