Այս օրինագծով մենք առաջարկում ենք Սեւանա լճից ջրառի վերին շեմ սահմանել տարեկան 170 մլն խորանարդ մետրը, եւ դա էլ խիստ երաշտի դեպքում։ Այս մասին Հայաստանի Ազգային ժողովի նիստում, «Սեւանա լճի էկոհամակարգի վերականգնման, պահպանման, վերարտադրման եւ օգտագործման միջոցառումների տարեկան եւ համալիր ծրագրերի հաստատման մասին» օրենքում փոփոխություններ կատարելու մասին օրինագծի քննարկման ընթացքում, դեկտեմբերի 5-ին ասաց Տարածքային կառավարման, տեղական ինքնակառավարման, գյուղատնտեսության եւ բնության պահպանության մշտական հանձնաժողովի նախագահ, կառավարող «Իմ քայլը» դաշինքի պատգամավոր Վարազդատ Կարապետյանը։
Նրա խոսքով՝ լրացուցիչ ջրառի դեպքում կառավարությունը կարող է հարցը դնել Ազգային ժողովի քննարկմանը։ Կարապետյանը նաեւ նշեց, որ Սեւանա լիճը չի կարելի դիտարկել միայն որպես «ջրամբար», որից անկանխատեսելի իրավիճակների դեպքում կարելի է լրացուցիչ ջրառ իրականացնել։
